DILI, (timorpost.com)– Koordenadór Jerál ba Saúde Timor-Leste, Joaquim Freitas hatete, governu tenke estabelese laboratóriu nasionál ida ne’ebé bele halo teste ka kontrolu produtu importasaun mai Timor Leste antes distribui ba merkadu labele fó impaktu ba povu nia saúde, tanba moras naun kontajiozu sa’e maka’as.
Nia dehan, Problema bo’ot tinan 22 seidauk iha laboratóriu nasionál ida hodi halo kontrolu ba produtu esportasaun sira atu hamenus volume hosi moras Naun Kontajiozu.
“Ita agora moras naun kontajiozu ne’e sa’e maka’as, diabetes, moras fuan, tensaun alta númeru ne’e kuaze ema mate problema bo’ot,”dehan Joaquim ba jornalista hafoin partisipa komemorasaun ezisténsia REBAS ba dala-2 iha Otel Timor, Sesta (24/05).
Nia dehan, bainhira importadór sira ba buka hahán sira, ai-moruk sira mai sira tenke haruka duni sampel ka teste mai katak produtu ai-han sira ne’e seguru ba povu nia saúde mak foin distribui ba merkadu.
“Agora ita bo’ot sira hatene bainhira kompañia ka Xineza ruma importa mai to’o Portu Tibar langsung tama ba merkadu saida mak ne’e. Entaun ida ne’e mak fatór ida ne’ebé kontribui ba taxa mortalidade sa’e ba beibeik, estadu tenke estabelese laboratóriu nasionál atu kontrolu ai-han molok distribui ba merkadu, “dehan nia.
Iha fatin hanesan, Vise Ministru Saúde, Flávio Brandão hatete, atu estabelese laboratóriu ba iha Ai-han nian, ne’e parte Ministerial halo ona diskusaun.
“Ita nia Institui Nasionál públiku ne’ebé mak sei hare, no sei lori papél ida ne’e ba oin, halo diskusaun entre Ministerial para hodi hare problema saúde públiku nian, ne’ebé kabe ba hahán ne’e presiza saudavel maibé, hakarak atu dehan de’it katak, laboratóriu ba ai-han ne’e importante tebes iha nasaun hotu, ida ne’e tenke iha, la’ós de’it ba hahán ba ai moruk no ba produtu médiku seluk ita tenke sertifika no garante katak, ida ne’e saudavel ba populasaun, “dehan Flávio.
1,686 total views, 3 views today
Bele hare Video Seluk :