MANUFAHI— Komandu Polísia Munisípiu Manufahi, lakon nia membru na’in ida, ajente polísia Vidal da Costa Xavio, ne’ebé maka durante ne’e hala’o nia knaar iha eskuadra polísia Postu Administrative Fatuberliu.
Komandante Polísia Eskuadra, Fatuberliu, Inspetór Asistente, Julito Couto Baptista, hatete, matebian ajente Vidal da Costa Xavio, horisehik sei halo hela nia servisu hanesan baibain maibé hodikalan matebian sente hirus matan moras, no parte família lori ona ospitál referral maibé ikus mai la salva vida.
“Ha’u nia membru ne’e horisehik sei serbisu hela iha eskuadra Fatuberliu to’o lorokraik,” dehan, Julio via telefone, Segunda.
Nia hatete, iha tuku 12 kalan matebian sente hirus matan moras nune’e familia lori ba sentru saúde komunitáriu Fatuberliu, Nune’e ohin da dersán tuku 3 tula fali mai sentru saúde Manufahi no tuku 7 da dersán kontinua transfere ba hospital referral Maubisi no ambulansia tula to’o iha Carbulau, Area Munisípiu Ainaru matebian husik iis iha dalan,” nia dehan.
Matebian Vidal, nu’udar xefe seksaun polísia eskuadra Fatuberliu, hahú tama polísia iha tinan 2021. Matebian mate husik hela fen kaben no oan na’in Neen.
Oras ne’e daudaun mate isin rai hela iha Same nune’e hodi hein konkordansia atu lori ba tau iha Fatuberliu ka Same hodi kontinua ba serimónia funeral.
Hanesan komandante, nia sente triste tanba lakon membru polísia ida hodi leet liuliu iha eskuadra polísia postu Fatuberliu.
“Ema laran di’ak tebes hala’o knaar ho di’ak hela maibé derrepente de’it na’i bolu nia hosi ita nia leet hodi husik hela ita,” nia hakotu.
347 total views, 3 views today
