LALEIA-Visé Prezidente Partidu CNRT, Gíl da Costa ‘Oan Soro’ hateten hakarak kadoras greater sunrise mai Timor-Leste, tenke vota ba CNRT, para lori Kay Rala Xanana Gusmão ba Primeiru Ministru.
Tanba ne’e, Oan Soro husu ba populasaun postu administrativu Laleia, munisípiu Manatutu, atu lalika estraga votu ba partidu ki’ik sira, tenke fó votu ba CNRT.
“Imi hakarak kadoras ne’e lori mai Timor ka ba Australia, ema ne’ebé fera ulun atu lori kadoras ne’e so Avó Nana mesak de’it, seluk laiha”, Oan Soro hatete iha mini kampana partidu CNRT, ne’ebé realiza iha postu Laleia, Kinta (20/04).
“Imi hakarak fronteira Timor ho Indonesia rezolve ka lalika, se hakarak vota ba CNRT”, nia dehan.
Nia hatete, iha eleisaun prezidensiál liubá, povu tomak fó ona votu ba doutor José Ramos Horta, tanba ne’e iha loron 21 fulan Maiu tinan ne’e, fó votu husi partidu CNRT, hodi lori Kay Rala Xanana Gusmão ba Pallasu Governu.
“Inan-Aman sira, 2023 ba kotuk, iha palku Manatutu, ita hameno malu ona, ohin mai ita hamutuk, lori doutor José Ramos Horta ba Prezidente Repúblika, no prepara aan mai ita hamutuk vota ba CNRT, lori Kay Rala Xanana Gusmão ba Pallasu Governu”, nia tatoli.
Entretantu, mini kampana ne’e hahú iha tuku 4 resin no remata iha tuku 6 lokraik, ne’ebé hetan observasaun husi orgaun eleitoral, inklui hetan seguransa masimu husi Polísia Nasional Timor-Leste munisípiu Manatutu, nune’e mós hetan partisipasaun masimu husi militante sira iha postu refere, aliadu partidu politiku sira, no movimentu sira hotu.
4,149 total views, 3 views today
Bele hare Video Seluk :
Subscribe to Timorpost
