Dili (TimorPost.Com)—Embaixador Nova Zelándia ba Timor-Leste, S.E. Philip Hewitt ohin hasoru malu ho Vise Primeiru Ministru no Ministru Koordenadór no Asuntu Sosiál (MKAS), Mariano Assanami Sabino, hodi ko’alia kona ba setór importante sira.
“Ohin ami enkontru ho Vise Primeiru Ministru no Ministru Koordenadór no Asuntu Sosiál (MKAS), Mariano Assanami Sabino, hodi ko’alia kona ba setór importante sira ne’ebé mak parte rua ne’e bele halo hanesan programa kona bá Edukasaun, no Diversifikasaun Ekonomia, Seguransa Komunidade”, hatete Embaixadór Nova Zelándia, S.E. Philip Hewitt, ba Jornalista sira iha Palacio Governu, Segunda (18/09).
Embaixadór ne’e hatete, Governu Nova Zelándia ho Governu Timor-Leste iha parseiru ida ne’ebé metin no amigavel tebes.
Husi ne’e, Governu Nova Zelándia prontu servisu iha setór importante sira hodi haforsa ekonomia Timor-Leste liu husi promosaun ba setór turizmu no setór agrikultura.
Daudauk ne’e, Governu Nova Zelándia, servisu hamutuk ho Kooperativa Kafé Timor-CCT oinsá mak atu reforsa setór agrikultura liu-liu parte kafé nian hodi aumenta produsaun no kualidade kafé iha Timor –Leste.
“Kona ba setór edukasaun, ami serbisu no koopera hamutuk no Ministériu Edukasaun (ME) oinsá mak atu hasae mutu kualidade edukasaun iha rai laran”. Nia dehan.
Liga ba seguransa Komunidade, Governu Nova Zelándia servisu hamutuk ho Instituisaun Polisia Nasionál Timor-Leste (PNTL), no Komisaun Anti Korrupsaun (KAK), hodi tau matan ba direitu sidadaun sira nian iha país ida ne’e.
588 total views, 9 views today
