DILI, (timorpost.com)— Polísia Sentífiku Investigasaun Kriminál (PSIK) loke ona prosesu averiguasaun hasoru oknum membru PSIK ne’ebé involve iha kazu husu osan ba família fujitivu Arnolfo Teves Jr, ho montante rihun 2, atu fó ba guarda prizaun hodi garante seguransa ba sidadaun Filipina iha prizaun preventiva.
Portavós PSIK, Investigadór Xefe, Mario Tavares, hatete relasiona ho informasaun ne’ebé espalla iha média sosiál tantu iha média nasionál kona-ba membru PSIK ne’ebé involve iha kazu husu osan ba família fujitivu Arnolfo Teves Jr n’e, prosesu interma ba iha membru PSIK lao ona, iha prosesu averiguasaun nia-laran.
“Ami loke ona prosesu averiguasaun hasoru membru PSIK ne’ebé involve iha kazu ne’e, tuir dokumentu ne’ebé ha’u asesu katak, sei loke prosesu averiguasaun durante prazu 10 dias (loron 10) atu konklui prosesu averiguasaun hasoru nia”, dehan Portavós PCIK, Investigadór Xefe, Mario Tavares, ba jornalista sira iha sala reuniaun PSIK, Tersa, (09/04).
Nia dehan, sira loke prosesu averiguasaun no mós sei loke tan prosesu disiplnár ba nia, maibé karik iha indísiu ba iha krime ruma, tenke partisipa ba Ministériu Publiku hodi prosesa.
“Aktu ne’ebé mak membru pesoál halo ne’e, ami konsidera aktu pesoál, tanba tuir gravasaun ka evidénsia ne’ebé iha ne’e pesoal mak halo, tanba ne’e ema ida-idak hatán ba nia responsabilidade ba aktu ne’ebé nia komete, prosesu averiguasaun no prosesu disiplnár,” nia afirma.
Portavós ne’e hatete, liga ho aktu ida-ne’e, daudaun ne’e pesoál PSIK hetan ona suspensaun ba nia servisu, para hein prosesu averiguasaun hodi la’o, prosesu suspensaun ne’e depende ba prosesu averiguasaun.
“Ha’u hakarak hatete katak, hanesan funsionáriu públiku, norma ne’ebé kesi katak banhira komete iregualidade ruma, sansaun ne’ebé previstu iha estatutu funsaun públika, atu hato’o kontra ida ne’ebé halo asaun sira ne’ebé fora husi buat ne’ebé mak atu halo”, nia dehan.
Aktu ne’ebé membru pesoál ne’e halo ne’e aktu pesoál, tanba “Imi jornalsita sira mós presiza halo analiza ba liafuan sira ne’ebé mak nia husu osan ba família sidadaun Filipina nee, maibé liga ba osan nee, simu ka la simu depois prosesu la’o ba mak foin hatene”.
“Tanba, PSIK la garante seguransa ba prizonéiru internasionál ne’e, tanba PSIK nia servisu atu lori nia ba audisaun primeiru introgatoriu judisiál ne’e de’it, maibé depois 48 oras, PSIK laiha ona servisu ho sidadaun Filipina ne’e, tanba nia iha ona instalasaun garantidu guarda prizonais, see oknum PSIK aproveita situasaun ida-ne’e, Entaun nia rasik responsabilidade,” nia afirma.
Tuir nia, laiha membru PSIK ida lori instutisaun PSIK nia naran ba vizita fujitivu Arnolfo Teves Jr iha prizaun, fujitivu refere labele hetan vizita husi membru PSIK ida-ne’e, sein iha autorizasaun hanesan titulár ba prosesu.*
4,218 total views, 15 views today
Bele hare Video Seluk :
Subscribe to Timorpost
