DILI (Timor Post.com)—Relasiona ho akontesimentu Iha loron Domingu (10/09), deskonfia parte Oknum Polísia Militár (PM) balun lori kilat ba kasa komunidade nia Karau iha aldeia Selihasan, suku Betano, postu administrativu Same, munisípiu Manufahi Fundasaun Mahein (FM) husu Komandu F-FDTL atu halo investigasaun ba membru sira iha terenu, hodi labele estraga no tiru komunidade nia animal sira.
“Ita husu responsabilidade tomak ba komandante Jeral seguransa F-FDTL ho PNTL, asegura membru sira iha terenu, hodi labele estaraga komunidade sira nia sasan, liuliu animal sira.”Diretór Fundasaun Mahein (FM), Nelson Belo na Timor Post, Segunda-feira (11/09/2023).
Tuir Diretor Fundasaun Mahein Nelson hatete, Timor Leste seidauk iha area protejidu hanesan ho nasaun seluk, atu uza arma estadu, hodi ba tiru animal sira, tanba ita promove ita nia animal fuik tantu maus sira.
Tanba ne’e husu ba Instituisaun rua, liuliu F-FDTL ho PNTL, tau regra rigor ba membru sira, bainhira uza arma estadu, hodi tiru komunidade nia animal sira, presiza iha relatóriu, no razaun tanba sá kilat tarutu, nune’e bele hatene tuir regra ne’e iha.
Entertantu estudante akademika UNTL, Fransisco Xavier dehan, instituisaun rua, hanesan F-FDTL ho PNTL, nia objetivu atu asegura povu no komunidade, la’os atu estraga fali nia animal sira, hanesan karau no seluk.
Prezensa F-FDTL ho PNTL ba komunidade ne’e importante tebes, tanba ne’e labele oho komunidade nia animal hakiak sira sem lisensa.
“Ita husu komandante Jeral husi instituisaun rua nian, atu fó orientasaun moral didi’ak ba ita nia membru seguransa sira iha terenu, kria kondisau dignu ba sira, atu koopera ho komunidade sira ho di’ak”. Estudante hateten.
Tuir krolojia ne’ebe Timorpost hetan katak, iha oras madrugada tuku 01:00 OTL, Karau na’in ne’ebé toba hein Karau iha luhan rona kilat tarutu.
Hafoin kilat tarutu, komunidade relata kedas situasaun ne’e ba iha parte autoridade aldeia Selihasan katak, kilat ida tarutu iha ai-laran.
“Hafoin ha’u simu informasaun ne’e, ha’u rasik liga ba Ofisiál Polísia Suku (OPS) Betano no ha’u rasik ba hamutuk ho komunidade sira atu buka tuir, maibé tanba kalan boot ami la ba ai-laran no ami hein de’it iha estrada terminal dalan atu liu ba Ferik Sare, suku Taitudak, postu Alas ninian,” Sarurnina haktuir ba Timor Post iha Manufahi, Domingu (10/09).
Nune’e, nia dehan, bainhira ho komunidade hein iha ne’ebá, iha tuku 04:00 OTL madrugada, sidadaun balun ho armas no karreta ho xapa matríkula A. 28.163 sai mai husi ai-laran.
“Sira ho karreta sai mai ami ho Karau na’in konsege para karreta ne’ebé tula sidadaun refere hodi husu tuir kedas ida lori karreta no ida mata dalan bolu mai tiru karau ne’e no kilat na’in mak se,” nia relata.
Portantu, bazeia ba informasaun ne’ebé Karau na’in rekolla hafoin trava sira iha dalan ne’e identifika kilat refere mai husi instituisaun Polísia Militár (PM).
“Sidadaun ida lori kilat ne’e husi Kelikai mane foun iha aldeia Seluhasan hanesan PM hala’o knaar iha Dili mak mata dalan no lori kilat ne’e ho naran inisiál RDC hanesan veteranus ida,” nia deklara.
2,472 total views, 6 views today
Bele hare Video Seluk :
Subscribe to Timorpost
