DILI (timorpost.com)—Hanesan Kuadru Partidu KHUNTO, atuál Deputada Olinda Guterres husi Bankada KHUNTO iha Parlamentu Nasionál hatete nia parte la hatene kona Konselleiru Másimu Partidu KHUNTO no Prezidente Partidu KHUNTO ne’ebé ba presta deklarasaun iha Polisiás Sientífiku Investigasaun Kriminál (PSIK).
“Ha’u la hatene konselleiru ho Prezidente Partidu KHUNTO ba presta deklarasaun iha PSIK, tanba agora ha’u iha foho hela, “dehan Olinda ba jornalista sira liu-husi telefone Sesta (05/04).
Nia dehan, maibé, tuir informasaun nia hatene katak konselleiru ho Prezidente Partidu KHUNTO ba presta deklarasaun ne’e, liga ho jestaun partidu nian, tuir loloos ne’e munisípiu sira halo rekere.
“Tanba, osan subvensaun partidu nian ne’e, ema munisípiu balun mai husu ha’u, maibé ha’u la hatene osan partidu nia ne’e ha’u nunka hatene ida ne’e, ne’ebé hodi bainhira ha’u fó hatene ba CNE, osan subsídiu ne’e valor ba munisípiu ka ou konselleiru partidu sira mak rai, “dehan nia.
Deputada ne’e dehan, tuir nia hatene katak konselleiru ho prezidente partidu KHUNTO nian ba PSIK, tuir hatene kona ba jestaun ka orsamentu subvensaun partidu nian, kona ba buat sira seluk iha ne’e iha lei nia okos, la bele subar ita an ita nia kalilin okos ne’e la bele. Ne’ebé, PSIK bolu ne’e, sira iha direitu tomak atu investiga, para sira tenke ko’alia duni.
Nia dehan, tanba ne’e, presiza iha duni notifikasaun, para sira presta deklarasaun. Partidu KHUNTO ne’e Naimori halo hanesan kompañia privadu.
Nia akresenta, osan ne’ebé, funsaun partidu nian ne’e la hatene ba los ne’ebé, no relatóriu ne’ebé halo ba CNE mós la loos.
“Informasaun dehan ha’u mak hato’o keixa ba PSIK mak konselleiru no Prezidente Partidu KHUNTO ba presta deklarasaun ne’e la los, tinan lima nia laran ne’e osan ba ne’ebé, hanesan fundadór no kuadru partidu, tanba ne’e ita husu para tenke prosesu duni, tanba ha’u la’ós estrutura laran, sira munisípiu sira mai ezije fali ha’u, maibé grasa adeus, tanba PSIK bolu ona, la’ós ha’u mak ba keixa iha ne’ebá ne’e la’e,” haktuir Olinda
2,262 total views, 6 views today
Bele hare Video Seluk :