DILI, (timorpost.com)— Polísia Nasionál Timor-Leste(PNTL) liuhosi Departamentu Intevestigasaun Kriminál Nasionál (DIKN) entrega hikas ona aimoruk item 150 ne’ebé antes ne’e polísia prende ba klínika Moris Foun.
Tuir Xefi Departamentu DIKN, Superintendente Polísia, João Belo dos Reis, hatete, loos duni katak antes ne’e PNTL liuhosi DIKN hamutuk ho ekipa tékniku husi Ministeriu Saúde ezekuta mandadu husi tribunál halo detensaun no aprensaun no mós buska konsege prende aimoruk item 150 husi klínika Moris Foun, tanba deskonfia hatama no fa’an ilegál laiha lisensa husi Ministriu #saúde.
Iha altura ne’eba, prosesu ba iha kazu ne’e konsege to’o iha tribunál no ikus mai tribunál deside ona no aplika medida koasaun apresentatasaun periódika no aplika medida koasaun proibisaun aujénsia, inklui medida koasaun kauzaun ba jerente klínika Moris Foun na’in-3.
Hafoin tribunál hatuun despaisu desizaun finál husi Priméiru Introgatóriu ne’e, parte polísia mós hetan despaixu husi tribunál atu devolve fali aimoruk item 150 ne’e ba kompaña klínika Moris Foun.
“Horsehik ami devolve aimoruk balun ona, no balun seidauk entrega tanba ami sei halo indetifikasaun hamutuk ho Ministériu Saúde depois ami halo tiha indetifikasaun hafoin bele entrega aimoruk sira ne’e, no ida ne’ebé ami alista ona horsehik ami devolve ona ba na’in kompaña klínika Moris Foun, tanba ida-ne’e despaisu husi tribunál mak mai”, dehan Xefi Departamentu DIKN, Superintendente Polísia, João Belo dos Reis, ba jornalista sira iha Komandu Jerál PNTL Kaikoli, Sesta, (01/03).
Nia dehan, aimoruk ne’ebé prende ne’e hamutuk item 150 maibé sira konsege entrega uluk ona item 100 resin, restu seidauk tama sei halo prosesu indetifikasaun.(*)
4,836 total views, 3 views today
Bele hare Video Seluk :
Subscribe to Timorpost
