DILI, (timorpost.com) — Polísia Nasionál Timor-Leste (PNTL) liuhosi Komandu PNTL munisípiu Dili, Kuarta-kalan, (22/11/2023) liubá, halo operasaun tama sai bairru iha Dili laran konsege ka’er membru Grupu Arte Marsiál (GAM) ne’ebé prátika treinu, maske Governu suspende ona durante fulan neen.
Operasaun PNTL iha kuarta kalan ne’e, parte patrullamentu polísia munisipiu Dili ba suku sira iha área postu administrativu Dom Aleixo, tama to’o aldeia no bairru sira, konsege hetan membru husi GAM Persaudaan Setia Hati Terate (PSHT), ne’ebé treinu namanas iha área Kampung Barru, Polísia Patrollamentu tuun kedas iha fatin refere hodi kaptura membru kuaze na’in 20.
Nune’e, parte patrollamentu kontaktu eskuadra PNTL Dom Aleixo tuun kedas iha fatin hodi tula ba halo identifikasaun no fó kedas sansaun atu bele kumpre desizaun Governu Konstitusionál dasia (IX) nian ne’ebé suspende hela atividade GAM.
“Iha Kuarta, 22/11/2023 kalan ami-nia ekipa partrullamentu ba área Dom Aleixo, konsege ka’er joven lubuk ida ho nia responsável ne’ebé prátika arte PSHT, pelumenus ema na’in 20 hanesan maka ami ka’er, tanba sira prátika arte ka treinu”, Komandante PNTL munisípiu Dili, Superintendente Xefe Polisia, Orlando Gomes, relata ba Timor Post iha nia servisu fatin Kuartel munisípiu Dili, Kaikoli, Sábadu, (25/11/2023).
Nia hatutan “Kalan ne’e kedas ami kontaktu ba eskuadra Dom Aleixo, tula joven sira prátika arte marsiál ne’e ba prosesu identifikasaun no informa mós desizaun governu nian ba sira”.
Komandante PNTL munisípiu Dili husu ba grupu arte marsiál hotu-hotu iha kapitál Dili tenke kumpri desizaun Governu nian, durante fulan neen oin mai ne’e labele prátika arte marsiál, banhira iha fali desizaun foun husi Governu mak bele la’o tuir.(*)
3,600 total views, 3 views today
Bele hare Video Seluk :
Subscribe to Timorpost
