DILI (timorpost.com) — Reprezentante Federation International Football Association (FIFA), hasoru malu ho Prezidente Partidu Kongresu Nasionál Kontrasaun Timorense (CNRT-sigla portugés) Kay Rala Xanana Gusmão, ho Sekretáriu Jerál Francisco Kalbuadi Lay.
Sorumutu ne’e realiza iha loron Kinta (08/06) lokraik, iha sede partidu CNRT Bairru dos Grilhos, ne’ebé hetan mós akompañamentu husi Prezidente Federasaun Football Timor-Leste (FFTL), Francisco Martins da Costa Pereira Jerónimo.
Prezidente Partidu CNRT, Kay Rala Xanana Gusmão, hatete iha enkontru informal nee, husi reprezentante FIFA hato’o kona-ba saida mak halo sira ona, no saida mak hakarak halo tan iha tinan lima mai nee.
“Sira mai hasoru ona Prezidente Federasaun, mais tanba ita-nia governu atu sai, governu ida seluk seidauk tama, ne’ebé enkontru ida ohin nee informal, hodi senor sira nee fó hatene kona-ba saida mak FIFA halo ona, no hakarak halo tan iha tinan lima mai nee”, Xanana dehan.
Iha fatin hanesan, Diretór Membru Asosiasaun Asia no Oseánia FIFA, Sanjeevan Balasingam, hatete sira la’ós ko’alia de’it ho Prezidente FFDTL ho nia ekipa, maibé ko’alia mós ho lideransa foun nasaun nee nian, tanba ba FIFA atu dezenvolve bola iha nasaun ne’ebé de’it, presiza servisu besik liu ho governu, no mós membru asosiasaun hanesan FFTL.
“Pontu save sira husi enkontru nee, ami simu husi senor Xanana Gusmão, katak governu foun ne’ebé mai, sei haree servisu hamutuk ho FFTL no FIFA, hodi dezenvolve infraestrutura bola iha nasaun nee”, nia informa.
Nia dehan, sira iha sentru treinamentu ne’ebé sai mós hanesan FIFA nia head quarter iha Timor-Leste, ne’ebé sei hadi’a ho fundu husi FIFA, no ida seluk mak Estádiu Nasionál, nee hanesan pasu daruak iha dezenvolvimentu infraestrutura bola nian iha Timor-Leste.
“Tuir mai ami sei haree projetu seluk ne’ebé FIFA iha, ne’ebé mak bola ba eskola sira, ha’u-nia kolega sira sei kontaktu ho lideransa foun husi Governu no FFTL, hodi lansa programa bola ba eskola sira iha nasaun nee”, nia promete.
1,785 total views, 3 views today
