DILI (timorpost.com)— Provedoria Direitu Umanu no Justisa ( PDHJ) liuhosi delegasaun teritoriál Oekusi konsege rekolla ona dadus balun kona-ba disputa fronteira rai Naktuku, iha suku Bene-Ufe, sub-rejiaun Nítibe, Rejiaun Administrativa Espesiál Oekusi Ambenu ( RAEOA).
Provedór PDHJ, Virgílio da Silva Guterres, hatete, PDHJ antisipa para desizaun ka akordu kona-ba disputa rai Naktuka tenke respeita ba direitu sidadaun sira nian no garante bein estár povu Naktuka nian.
“Provedór la haree kona-ba markasaun maibé atu haree kona-ba impaktu ne’ebé posivelmente sei mosu iha fronteira ne’eba, liuliu preokupasaun husi komunidade sira, fatin ne’ebé sai objetu diskusaun agora ne’e, komunidade iha aldeia tolu mak halo atividade agrikola iha rai ne’e, nune’e mós uma-kain lubuk ida iha ne’eba, entaun provedór antisipasi mak desizaun no akordu saida de’it Estadu halo ho rai seluk, ne’e objetivu tenke atu proteje diréitu sidadaun nian, no garante bein estár povu nian”, dehan provedór PDHJ, Virgilio Guterres, ba jornalista sira iha edifísiu Tribunál Rekursu, Kaikoli, Sesta, (02/02) hafoin hasoru malu ho Prezidente TR, Deolindo dos Santos.
Nia hatete, daudauk ne’e Delegasaun Teritoriál PDHJ nian iha Oeksui akompaña no rekolla ona dadus balun relasiona ho preokupasaun disputa rai Naktuka hodi haree liu kona-ba diréitu sidadaun sira nian.
Iha sorin seluk, Tenente-Jenerál Reformadu, Lere Anan Timur, hatete rai Naktuka ne’e istóriku, kulturá no mós diréitu jurídiku legál.
“Kultura ita bele dehan Naktuka ne’e Timor nian, mais timoroan balun iha sorin ne’e, hanesan fetosan-umane, maske sira nu’udar fetosan umane labele efeta soberania nasaun nian, sim ita fetosan-umane ha’u bele autoriza o, ita nu’udar maun-alin ho fetosan-umane, o bele mai halo to’os natar iha ha’u-nia rai Naktuka nian, mais o labele sai rai-nain”, Tenente-Jenerál Reformadu, Lere Anan Timur, hatete.
Lere hatutan, “Uluk pilar ne’ebé Olanda ho Portugál tau mak vale, entaun tenke vale nafatin laiha lei ruma altera katak laiha, purke lójika ita haree ba Portugues nia tempu Timor fahe ba rua ho pilar Olanda ho Portugues sira tau, liña ne’ebé fahe, ida-ne’e kestaun soberania”.
Lere la konkorda sobu tiha pilar ne’ebé Olanda no Portugál tau ona tanba ne’e kestaun soberania, ema barak mate ba Timor la’os atu fó rai sorin ba Indonézia, tanba ne’e Governu Timor-Leste no Indonézia tenke rezolve ho ulun malirin atu nune’e nu’udar nasaun viziñu labele iha problema ba malu.
Nia rekomenda ba Governu nasaun rua ne’e tenke haree mós ba lei internasionál kestaun soberania katak rai ne’ebé Indonézia nian ne’e Indonézia nian no rai ne’ebé Timor-Leste nian ne’e tenke Timor-Leste nian.(*)
3,024 total views, 3 views today
Bele hare Video Seluk :
Subscribe to Timorpost
