DILI(Timorpost)—Rezultadu selesaun ba kandidatu traballadór atu ba servisu iha Australia, parte SEFOPE seidauk bele fó sai agora tanba sei iha hela prosesu screening.
Iha iha loron 6 to’o loron 17 fulan Marsu 2023, Joven timor-oan hamutuk 55380 maka halo ona aplikasaun via online ba vaga servisu Austrália.
“Vaga online ne’ebé mak seidauk publika sai naran tanba ekipa sei halo hela screening,” informa Diretór Diresaun Nasionál Empregu Exterior, Sekretariadu Estadu Formasaun Profisionál Empregu (SEFOPE), Filomeno Soares, iha salaun Timor Lodge, Komoro, Kinta (08/06).
Nia hatete, data atu publika sai naran kandidatu sira ne’e to’o agora seidauk klaru, maibé posibilidade sei taka sai rezultadu hafoin formasaun governu foun.
Diretor ne’e hatutan, prosesu scereening ne’e rasik la’o kleur tanba joven barak tebes maka aplai ba vaga ne’e. Ekipa SEFOPE presiza iha konsentrasaun di’ak hodi avalia tuir rekizitu ne’ebé mak empregador sira fó.
Tanba prosesu avaliasaun ne’ebé agora SEFOPE halo daudaun ba kandidatu sira la hanesan ho tinan hirak ba kotuk.
“Vaga tinan hirak liu ba ema konsidera ita hanesan unskill, maibé agora tama ona iha preparasaun joven sira medium-skill no skill para bele hetan rekoñesimentu husi nasaun ne’ebé mak atu fó servisu ba timoroan sira, lae ema konsidera ita mak hanesan traballadór Unskill hela de’it, ita nunka prepara ema iha medium-skill no skill,” nia hakotu.
Antes ne’e, Diretór Jerál SEFOPE, Paulo Alves, hatete, SEFOPE sei halo publikasaun rezultadu naran kandidatu traballadór atu ba servisu iha Australia hafoin eleisaun parlamentar fulan Maiu ho razaun preokupa ho preparasaun eleisaun nian.
“Ita sei publika sai naran depois eleisaun, tanba saida maka publika depois eleisaun, tanba eleisaun nee ema barak sei okupadu, entaun depois dia 21 Maiu Eleisaun liu tiha sira haree naran sira nee hodi bele publika sai “, nia dehan ba Timor post iha Sala Trade Invest, Kolmera, Kinta (04/05).
Entretantu tuir loloos rezultadu ne’e publika tiha ona iha fulan Dezembru tinan maibé husi aplikante 41.000 iha aplikante 14 mil nia naran lakon iha sistema no sistema akapta de’it aplikante 10.000, maibé ikus mai ekipa avaliasaun halo ba kandidatu 200 mak bele tama ona iha kritériu.
Entaun haree ba númeru ne’ebé la prienxe ba vaga ne’ebé governu Australia husu nune’e maka SEFOPE husi loron 6-17 fulan Marsu 2023 halo fali prosesu foun ba kandidatu timoroan sira hodi rejista no tuir fali aplikasaun no ikus liu rejista kandidatu ka aplikante hamutuk 55380 maka aplika iha sistema online nee.
Vaga ne’ebé mak governu Australia husu mai timoroan sira iha tinan ida ne’e hamutuk 8 mil vaga, maibé dezafiu ne’ebé agora Timor Leste enfrenta hela maka kona-ba pasaporte, tanba foin lalais timoroan kuaze 300 resin mak la konsege ba Australia tanba pasaporte laiha. No sira ne’ebé mak antes ba tiha mai fali mós hanesan pasaporte mate tiha ona atu tau karimbu ba mós ema la konkorda.
2,178 total views, 12 views today
