DILI, (timorpost.com) — Komandante Unidade Polísia Marítima (UPM), Superintendente Polísia, Eugenio Pereira, rekoñese postu UPM iha Kom, munisípiu Lautém nian laiha transporte marítima hodi fasilita membru kontrola peska ilegál iha tasi Lautém nian..
“Ita iha postu ne’ebé maka estabelese iha munisípiu Lautem, liuliu iha Kom, iha ne’ebá iha seksaun postu ida, ami rekoñese ke iha ne’ebá sira-nia fasilidade laiha, liuliu transporte marítima nian ne’e laiha”, Komandante UPM, Superintendente Polísia, Eugenio Pereira, informa ba jornalista iha nia kna’ar fatin Kuartel UPM Lesidere-Dili, Segunda, 20/11/2023.
Nia hatutan, nu’udar Komandante, dezafiu ka problema ne’e sai preokupasaun ba Komandu UPM nian, tanba ne’e Komandu esforsu hela tau ona iha Orsamentu Jerál Estadu (OJE) 2024 nian atu bele sosa transporte hodi fasilita membru sira hodi kontrola kosteira munisípiu Lautém nian.
“Ida-ne’e maka sai hanesan mós preokupasaun husi komandu, liuliu husi Unidade Polísia Marítima, ita tenta para depois tau iha orsamentu ba iha 2024, ita aprezenta ona, ita fiar katak Governu sei tau-matan ba ida-ne’e”, Komandante UPM ne’e hatete.
Komandante UPM afirma, kondisaun mínimu liga ba transporte ne’e importante atu bele fasilita membru sira kontrola atividade peska ilegál sira ne’ebé tama iha área juridisaun munisípiu Lautem nian.
Tanba ne’e, Komandante UPM sempre rekomenda preokupasaun membru sira nian ba komandu jerál PNTL atu orsamenta ba tinan oin para bele koresponde preokupasaun hirak ne’e.
Komandu UPM daudauk ne’e establese ona postu vizilánsia 10 iha fatin estratéjia sira iha teritóriu Timor-Leste, inklui ona Atauro ho Oekusi, no planu hela ba tinan 2024 atu aumenta tan postu vizilánsia iha parte Beasu, munisípiu Vikeke nian no fatin sira seluk tan hodi kompleta mós kondisaun, no transporte atu kontrola tasi laran.(*)
609 total views, 9 views today
Bele hare Video Seluk :
Subscribe to Timorpost
