DILI (timortost.com) – Atu kontrola suspeitu sira iha Sela detensaun Kaikoli, Governu liuhusi Ministériu Interior, hetan apoiu hosi parseiru Timor-Leste Police Developmente Program (TLPDP), sei monta CCTV hamutuk 20 iha aredores Komandu Munisípiu Dili.
Vise Ministru Interior (VMI), Antonio Armindo, hato’o kestaun ne’e ba jornalista sira hafoin remata vizita sela detensaun iha Komandu Munisípiu Dili, Kinta (08/09).
“Ohin ita mai ho parseiru TLPDP, polisia nia parseiru haree ita-nia situasaun ne’ebé akontese iha Munisípiu Dili,” nia informa.
Nia dehan, daudaun ne’e ho Komandante Munisípiu Dili, Superintendente Xefe Polisia Henrique da Costa, akompaña lori parseiru TLPDP mai atu ajuda monta CCTV.
“Hanesan ita hatene, parte Komandu Munisípiu Dili, sira-nia CCTV ne’ebé monta ne’e kleur ona, balun dezde UN nia tempu, entaun ida ne’e mak prezudika sira labele halo monitorizasaun ba iha ema sira ne’ebé detein hela iha ne’e,” nia konta.
Tanba ne’e, hafoin kazu ne’e akontese parte Governu mós hanoin oinsá atu monta CCTV, labele hein kostrusaun Munisípiu Dili, tanba ne’e parseiru TLPDP hakarak ajuda.
“Ita tenke hahú ona haree monta CCTV, para ajuda sira, atu kontrolu ba suspeitu sira ne’ebé detein iha sela Detensaun,” nia dehan.
Nia hatutan, la’ós Governu Timor-Leste nia osan, maibé Governu husu Parseiru TLPDP hodi komplemeta, tanba tinan ne’e la prevee osan ba CCTV.
“Ohin sira mai ho ha’u iha ne’e hasoru Komadante Munisípiu Superintendente Xefe Polisia Henrique da Costa ho Komadante sira hotu,” nia haforsa tan.
Tanba ne’e, hahú aban parte TLPDP haruka Kompañia sira halo kotasaun hodi monta CCTV ho Layar, hodi nune’e, ofisiais ne’ebé hein iha sela detensaun iha oras 24 ne’e bele monitoriu iha layar.
“Ohin kestaun emidiata ita halo ho parseria TLPDP sira, atu monta CCTV iha areadores Komandu Munisípiu Dili, depende ba kotasaun ne’ebé halo, parese ke to’o iha CCTV 20 hanesan ne’e, tanba sei monta hotu iha aredores Munisípiu Dili”, nia hateten.
2,127 total views, 3 views today
