Dili (timorpost.com) — Governu liuhosi Ministériu Saúde implementa Kampaña Nasionál vasinasaun integradu ba tomak alvu ba labarik tinan lima mai kraik, maibé munisípiu Dili no Likisá mak seidauk atinje alvu.
“Importante atu kompleta ita-nia oan nia vasina hodi fó protesaun másimu ba sira. Dadus atuál ba Kampaña Nasionál Imunizasaun hatudu katak munisípiu barak atinje ona alvu ba kampaña tinan ida-ne’e, maibé munisípiu Dili no Likisá menus, seidauk atinje alvu”, Informasaun ne’e Timor Post asesu liuhosi pájina MS nian, Kinta (23/02/2023).
Ho situasaun hanesan munisípiu Dili no Likisá, fó impaktu atinjimentu nasionál la bele alkansa nia alvu.
To’o ohin loron, iha Munisípiu Dili labarik hamutuk 22.723 mak seidauk partisipa iha kampaña nasionál ida-ne’e.
“Iha munisípiu Likisá labarik hamutuk 1.429. Ida ne’e hatudu katak ita-nia labarik sira barak mak sei vulneravel hela no fasil atu hetan moras Sarampu, Rubella, Polio, moras hosi baktéria Pneumokoxika no mós moras ne’ebé kauza hosi Lombriga, inklui la hetan Vitamina A atu proteje sira-nia saúde matan”, sita iha komunikadu.
Bainhira labarik ida la hetan vasina, la hetan protesaun, nune’e sei sofre impaktu hosi moras perigozu sira ne’e.
Nafatin enkoraja ba inan-aman sira hotu atu lori labarik sira simu vasina kontra moras Sarampu 1, Rubella, Polio, moras kauza hosi baktéria Pneumokoxika, no simu ai-moruk Vitamina A no ai-moruk kontra Lombriga.
“Keta lakon oportunidade atu fó protesaun ba ita-nia oan sira”, hakotu.
1,877 total views, 3 views today
Bele hare Video Seluk :