DILI (timorpost.com) – Reabilitasaun sede suku Bekora, postu administrativu Kristu Rei, munisípiu Dili, finaliza ona hodi atende komunidade sira atu halo tratamentu ba dokumentu esensiál sira.
“Ami nia badaen na’in-haat mak halo reabilitasaun ba iha sede suku ida ne’e durante fulan rua nia laran agora hotu ona hein de’it semana oin hodi halo servisu atu atende komunidade sira trata dokumentu esensiál,” xefe suku Bekora, Antonio da Silva Soares, hateten ba Timor Post iha sede suku Bekora, Tersa (04/07).
Xefe suku ne’e esplika, osan restu husi Programa Nasionál Dezenvolvimentu Suku (PNDS) ne’ebé halo reabilitasaun ba sede suku mak uza hodi sosa fali material hanesan simente, rai henek, besi no kalén hodi halo konstrusaun ba uma ki’ik ida ho kuartu rua, entaun ida ba Ofisial Polisia Suku (OPS) mak uza no kuartu ida fali uza hodi tesi lia ruma bainhira komunidade sira halo problema iha suku laran.
Portantu, konstrusaun uma ki’ik ne’e hodi nune’e bele fasilita polisia OPS uza hodi deskansa iha tempu kalan polisia OPS ne’ebé daudaun ne’e halo servisu iha suku refere ne’e iha Tasi-Tolu entaun susar bainhira akontese problema ruma labele atende lalais, tanba hela dook husi suku refere.
Tanba ne’e mak sira harii tan uma ki’ik ida ne’e hodi fasilita polisia refere bele deskansa hodi nune’e dadeer mai bele kontinua nafatin hodi atende no kontrolu iha suku refere labele mosu konflitu.
Nia hatete, uma refere daudaun ne’e taka ona kalén no nahe ona laran no reboka ona hein de’it semana oin mai inaugura hodi entrega ba suku hodi bele utiliza ba atende nesesidade urjente.
Enkuantu, orsamentu ho montante rihun 12 USD halo reabilitasaun sede suku no halo konstrusaun ba uma ki’ik postu polisia OPS no uma tesi lia ba problema.
Portantu, suku Bekora ho nia aldeia 10 ho nia populasaun hamutuk 23.811 ho nia xefe família rihun 6-resin kompostu feto no mane.
2,064 total views, 3 views today
Bele hare Video Seluk :
Subscribe to Timorpost
