DILI, (timorpost.com)—Reprezentante Vatikanu iha Timor-Leste Núnsiu Apostóliku, Monseñór Marco Sprizzi, hasoru malu ho Prezidente Repúblika Jose Ramos Horta ko’alia kona ba preparasaun simu vizita Papa Francisco mai Timor-Leste.
Reprezentante Vatikanu iha Timor-Leste Núnsiu Apostóliku, Monseñór Marco Sprizzi, hateten ba jornalista sira hafoin hala’o enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Kinta (11/04).
“Ohin ha’u mai halo enkontru ho ita Prezidente Repúblika José Ramos-Horta ne’e nu’udar enkontru domin no amizade hodi ko’alia mós kona-ba preparasaun ba vizita Papa Francisco nian mai Timor-Leste iha tinan ida ne’e, no aban Kámara Ekleziástika Arkidioseze Dili sei anunsia kona ba loron vizita Papa Francisco nian mai Timor-Leste” informa Reprezentante Vatikanu iha Timor-Leste Núnsiu Apostóliku, Monseñór Marco Sprizzi.
Maibé, tuir nia katak nia parte sei la ko’alia klaramente ba preparasaun ne’e, tanba aban iha Kámara Ekleziástika Arkidioseze Dili sei iha anunsia ofisiál ba vizita Santu Padre Papa Francisco nian mai Timor-Leste.
“Aban ita Kamara Ekleziastika Arkidioseze Dili sei anúnsiu ofisial ba loron vizita Papa Francisco nian no sei ko’alia asuntu hotu liu-liu liga ho vizita Papa Francisco nian,” nia hateten.
Aleinde nia dehan tuir observasaun preparasaun governu no estadu Timor-Leste nee exelente tebes.
“Ha’u nia observasaun pesoál kona-ba preparasaun ne’ebé Governu no Estadu Timor-Leste halo hodi hein vizita Papa Francisco nian ne’e exelente tebes. Antes ne’e hasoru malu ho Primeiru-Ministru Kay Rala Xanana Gusmão, ohin ho Prezidente Repúblika José Ramos-Horta no kuaze loro-loron kontaktu ho Ministru Administrasaun Estatál (MAE) Tomas do Rosário Cabral no Ministru Prezidénsia Konsellu Ministru (PCM) Agio Pereira no ho Ministériu relevante sira seluk hanesan Ministériu Obras Públikas (MOP), Ministériu Interiór (MI) no ministériu sira seluk,” katak nian.
891 total views, 3 views today
Bele hare Video Seluk :
Subscribe to Timorpost
