BAUKAU – Reitór Institutu Superior Cristal (ICS), Sebastião Pereira, husu estudante foun liuliu estudante ne’ebé involve iha Grupu Arte marsiais labele lori arte marsiais ba kampus, tanba ISC hanorin ema sai sidadaun no sarani ne’ebé di’ak tuir lema padrueiru São João Bosco nian.
“Ita iha ne’e so iha de’it mak pas, dame, see mak tama arte marsiais husi munisípiu Vikeke no postu administrativu Venilale molok tama iha kampus ISC soe hela iha area Uailili ne’ebá, iha ISC polo Baukau ita ida de’it, see mak diresaun husi Lanud nian tama arte marsiais husik hela iha ne’ebá, husi Vila Antiga mós husik iha ne’ebá, estudante sira ne’ebé husi Laga, Baguia husik hela iha Buruma ne’ebá, iha ne’e buat sira violénsia labele akontese iha ita nia kampus, iha ne’e sai ida de’it, hotu-hotu iha ne’e eskola Salezianu nian,” Dehan reitór ISC Sebastião Pereira Kuarta feira (21/2) iha nia diskursu abertura orientasaun ba estudante foun.
Nia esplika, kuandu tama ona iha ISC polo Baukau ne’e sai ona antigu alunu João Bosco, labele hirus malu, labele baku malu iha ne’e no dosente sira mós labele fó presaun ba estudante, labele baku, labele siak no labele hakilar.
Tanba ema dehan violénsia ne’e mak baku ema ne’e labele akontese, ida mak presaun psikolojia, dosente sira haree estudante la hatene, hanorin sira, komu la hatene ne’e mak mai eskola, see matenek ona iha uma la presiza mai eskola.
“Ita nia Institutu, ne’e ita nia padrueiru São João Bosco sei akompaña ita ho ita nia Inan Nossa Senhora Auxiliadora Cristao akompaña ita boot sira para eskola mós sempre susesu, husu dixiplina tempu antes minutu 15 atu tama aula hotu-hotu iha ona kampus,” nia fó hanoin.
Nia kontinua fó hanoin katak, dixiplina mak sai xave susesu ba pesoál ida-idak, liuliu estudante sira atu atinji objetivu, tanba ISC polo Baukau hetan akreditasaun husi ANAAA hetan valor B.
“Tanba ne’e husu imi ne’ebé tama ona iha ne’e estuda didi’ak sai ema ne’ebé iha kualidade ba família no nasaun,” nia hatutan.
5,754 total views, 6 views today
Bele hare Video Seluk :
Subscribe to Timorpost
