BAUKAU (timorpost.com) – Komisaun F trata Asuntu Saúde, Seguransa sosiál, Igualdade Jéneru asuntu feto ho labarik, asuntu Ema ho Defisiénsia, asuntu Ferik ho Katuas, promete sei informa ba Sekretáriu Estadu no Igualdade (SEI) atu hapara apoiu osan ba grupu sira ne’ebé hala’o atividade hakiak animal.
Tanba tuir Prezidente Komisaun F, Maria Gorumali Barreto, fiskalizasaun komisaun nian durante loron tolu iha munisípiu Baukau, deteta grupu feto ne’ebé hetan programa empoderamentu ekonomia feto liuhusi fundus rotativu iha fallansu balun liuliu grupu ne’ebé hakiak animal Fahi to’o oras ne’e Fahi laiha hotu tanba razaun pesti mak kona.
Nia esplika, fundus rotativu ida ne’e ninia objetivu tuir loloos di’ak oinsá atu empodera feto sira iha area remotas para hadi’a sira nia ekonomia moris loron-loron nian hodi sustenta ba família liuliu ba oan sira nia eskola inklui sira nia nesesidade iha uma laran.
“Grupu sira ne’e maioria halai liu ba hakiak animal, tuir informasaun no ami nia fiskalizasaun, ami ba husu grupu sira ne’e dehan katak animal ne’e mate tanba pesti, ne’ebé ita atu dehan katak naumidigas hotu-hotu hakiak Fahi, se moras Fahi nian ita hotu hatene ne’e akontese iha Timor moras animal seluk laiha, mais ita ba dehan mate hotu ne’e ita pergunta boot,” nia hateten ba Timor Post iha Baukau, Kinta (22/02).
Tanba iha Timor-Leste lia mate no lia moris sempre oan feto no oan mane tenke lori animal ne’e ba foho, ida ne’e rekomenda ba Sekretáriu Estadu di’ak liu hapara grupu ida hakiak animal ne’e.
“Se nia halo atividade ekonomia iha tipu seluk ne’e ita bele konsidera mais kuandu hakiak animal ita labele konsidera tanba hakiak animal ita ta’uk mak ida ne’e, kuandu lia mate no lia moris kona, nia dezaraska, no nia tenke lori ida ne’e ba, entaun objetivu husi grupu ne’e hela naran de’it,” deputada ne’e hateten.
Nia hatete, programa fundus ida ne’e ho burokrasia no prosesu ne’e naruk, maibé laiha mekanizmu ida oinsá prepara sira ho di’ak, oinsá atu jere osan ne’e rasik tuir sira ninia proposta, ne’e laiha mekanizmu preparasaun ba sira liuliu ba jestaun entaun mosu problema hanesan akontese daudauk iha baze.
“Grupu ida hatama ema, Xefe grupu ba simu osan mai fali osan ne’e nia rai nonook no la fó sai ba membru, maibé tuir loloos ita kria grupu xefe ba simu osan mai fali informa katak, osan ba grupu ita kria ne’e fó sai dehan osan mak ne’e ita ezekuta oinsá, na realidade ne’e la akontese, kuandu ami ba vizita grupu sira iha fatin balun ami husu no lee naran grupu nian buka tuir foin membru sira hakfodak dehan osan ne’e mai tiha ona ka,” nia deklara.
Iha parte seluk, nia dehan, durante fiskalizasaun, komisaun F la deteta problema kona-ba stock ai-moruk iha ospitál rejionál, sentru saúde no postu saúde sira, maibé deteta mak problema odamatan iha R-Xis nian ne’ebé parte komisaun sei hato’o ba Ministériu Saúde (MS) atu hadi’a lalais.
5,541 total views, 9 views today
Bele hare Video Seluk :
Subscribe to Timorpost
