DILI, (timorpost.com)—Organizasaun Naun Governamentál (ONG) Fundasaun Mahein (FM) konsidera aktu husi polítika Sekretáriu Estadu Asuntu Toponímia Organizasaun no Urbana (SEATOU) duni komunidade hanesan invazaun tama iha teritoriu nasional.
Diretór Ezekutivu Fundasaun Mahein ( FM), Nelson Belo, hatete envolvimentu F-FDTL iha ekipa konjuntu SEATOU hodi halo eviksaun ba sidadaun sira iha kapitál Dili ne’e, hanesan invazaun.
“Ne’e hatudu katak halo fali tipu invazaun ba nia povu rasik. Ita dehan, violasaun hasoru liberdade ema sivíl nian, tanba governu toman uza militár no polisia ne’ebé maka nia tendénsia no nia sintoma ne’e ba liu violénsia duke aprosimasaun paz no hakmatek, “dehan Nelson ba jornalista sira iha nia kna’ar fatin Bairru dos Grilos Sesta (19/04).
Nia haktuir, ida ne’e kria ta’uk ba populasaun halo populasaun sente la iha paz iha nia rai rasik.
“Ita bolu governu ida ne’ebé maka la iha krebilidade di’ak no governu ida ne’ebé maka hakarak hatudu de’it liman kro’at, governu ida ne’ebé maka la aproxima nia populasaun ho di’ak, atu bele fó informasaun ba nia populasaun para bele involve iha prosesu dezenvolvimentu Nasionál”.
Tuir loloos ne’e, sira la bele aviza ba nia povu katak se mangame, ami utiliza polisia no militár, polisia ho militár ne’e povu nian, atu proteje povu la bele lori fali hodi intimida nia povu, ida ne’e fizikamente no piskolojikamente sira halo impaktu boot dezenvolvimentu demokrasia, tanba kria sosiedade ida ne’ebé ta’uk, tanba uitoan-uitoan uza militár no polisia, “dehan Nelson.
Tuir nia katak, envolvimentu F-FDTL, ida-ne’e la iha ligasaun ba iha komandu Militár, tanba komandu militár ne’e suporta governu nia programa, sira sempre hamutuk ho Governu atu suporta programa saida de’it maka dezenvolvimentu nasionál ne’e, sira suporta. Agora problema ne’e maka ne’e, tanba sa mak governu ka membru governu sempre uza militár ka polisia halo ida ne’e.
“Uza sala povu nia liman kro’at hodi hasoru povu, ne’ebé ha’u hanoin la iha liga ho komandu Militár, komandu Militár halo nia knaar, maibé governu maka uza sala militár nia prezensa,”akresenta Nelson.*
1,125 total views, 3 views today
Bele hare Video Seluk :
Subscribe to Timorpost
