(Reportajen Estaziadu Cornélio Mota/ Asistente Editor Hermenegildo da Costa Tilman)
Dili (Timor Post) –Seminarista na’in 40 husi semináriu Maiór Inter diosezanu São Pedro no São Paulo (SPEPAL) Fatumeta-Dili, hala’o atividade formativa semana pastoral iha Parókia São José Maubara, Likisá.
Xefe asistente semana Pastoral iha Parókia Maubara, seminarista Francisco Pereira Cardoso, hatete, atividade ne’e ho tema “Capacitar e Formação” ne’ebe mak seminarista nain-40 sei realiza iha loron 6 fulan Juñu to’o 12 Juñu tinan ne’e.
“Atividade Pastoral ne’e realiza tanba bazeia ba programa anuál Semináriu Maiór Inter diosezanu SPEPAL nian, ne’ebé kada tinan Seminarista sira sai ba parókia sira iha área Arkidioseze Dili, dioseze Baukau no Maliana nian ho objetivu atu seminarista sira bele hola parte iha sarani sira nia leet hodi haree no sente mós realidade moris sarani nian iha parókia sira”, Informa Xefe Asistente semana Pastoral iha Parókia Maubara, seminarista Francisco Pereira Cardoso, iha rezidénsia Parókia São José Maubara-Likisá, Segunda (06/06).
Nia dehan, durante iha Semana pastoral nia laran seminarista sira sei realiza mós atividade balu ho sarani sira hanesan reza tersu hamutuk iha família, rona problema ne’ebé sarani sira hasoru, no sira sei ba hala’o mós vizita ba uma-kain sira hodi foti dadus ruma relasiona ho programa parókia nian.
“Durante ne’e ami sei ba hela ho sarani sira tuir programa ne’ebé Parókia fahe ona ne’ebé kada ema na’in rua-rua sei ba hela iha família ida hodi bele partilla mós esperiénsia ne’ebé ami aprende durante formasaun iha semináriu no hanesan mós biban ida atu ami bele aprende mós esperiénsia foun ruma husi sarani sira,” dehan nia.
Tuir programa Semana Pastoral nian katak, seminarista hirak ne’e sei ba hela ho sarani sira iha kapela Saramapo, Loes, Gisu, Lisa-Dila, Vatu-Vou, Laulara, Maubara Lisa, Guguleu, Dair no Dariana durante semana ida no bainhira fila husi kapela sira mai parókia sei realiza mós atividade balu hanesan Jogo amizade ho kalan kulturál iha sábadu semana ne’e hodi anima sarani sira iha parókia refere. (Lee Notisia seluk iha Jornál Timor Post/Asesu You Tube Timor Post)
703 total views, 3 views today
Bele hare Video Seluk :
Subscribe to Timorpost
