DILI, (timorpost.com)— Reuniaun Konsellu Ministru Kuarta horseik (20/03) ne’ebé realiza iha Palásiu Governu Dili aprova ona projetu dekretu Governu ne’ebé husi Ministru Administrasaun Estatál (MAE), Tomás do Rosário Cabral, ne’ebé estabelese data ba realizasaun asembleia aldeia no konsellu suku iha ámbiru prosedimentu eleisaun lider komunitáriu sira.
Komunikadu imprensa ne’ebé Timor Post asesu ohin (21/03) liuhosi portál Governu Timor-Leste nian katak, tuir kalendáriu ne’ebé aprova ona, prosesu konstituisaun meza eleitorál suku no kandidatura ba eleisaun xefe suku no ninia kontensiozu, sei hala’o iha loron 12 fulan-abríl tinan 2024. Períodu informasaun públika no edukasaun eleitór kona-ba prosesu eleisaun lideransa komunitária nian sei hala’o to’o loron 24 fulan-abríl tinan 2024.
Eleisaun xefe suku ne’e sei hala’o iha loron 27 fulan-abríl no apuramentu ba rezultadu tenke termina iha loron 28 fulan-abríl tinan 2024. Bainhira laiha kandidatu xefe suku ne’ebé hetan votu válidu liu metade ne’ebé fó-sai, sei realiza fila-fali votasaun daruak entre kandidatu rua ne’ebé hetan votu maioria iha loron 13 fulan-maiu tinan 2024.
Votasaun ba eleisaun lia-na’in no reprezentantes juventude ba konsellu suku sei hala’o to’o loron 8 fulan-maiu ka to’o loron 24 fulan-maiu tinan 2024.
Tuir mai suku 10 ne’ebé sei realiza eleisaun suku mak suku 5 lokaliza iha munisípiu Dili mak hanesan tuir mai, suku Ailok ho nia aldeia 5 lokaliza iha postu administrativu Kristu Rei, suku Benonuk, Madohi no Manleuanna ho aldeia hamutuk 28 iha postu administrativu Dom Aleixo, no suku Mantelau ho aldeia 6 iha postu administrativu Metinaru.
Entretantu suku 5 seluk lokaliza iha munisípiu Aileu, Manatuto no Vikeke mak hanesan tuir mai, Suku Bokolelo ho aldeia 4 iha postu administrativu Laulara, suku Lekitura ho aldeia 4 iha postu administrativu Aileu, munisípiu Aileu nian. Nune’e mós suku Laikoe ho aldeia 4, suku Uma Kaduak ho aldeia ida iha postu administrativu Laklo, no suku Sikone-Diloli ho aldeia 2 iha postu administrativu Barike, munisípiu Manatuto nian no suku Builo ho aldeia 4 iha postu administrativu Ossu, munisípiu Vikeke nian.
Tuir Sekretariadu Tékniku Administrasaun Eleitorál (STAE) dadus provizóriu husi suku 10 no aldeia 53, eleitór ne’ebé sei partisipa iha votasaun hamutuk 26.992.(*)
3,576 total views, 3 views today
Bele hare Video Seluk :