DILI (Timor Post) – Jenerál Reformadu Tito da Costa Cristovão “Lere Anan Timur”, hatete nia prontu kompete iha kongresu FRETILIN, atu sai Prezidente Partidu.
“Ha’u prontu atu servi, atu servi agora ha’u hanesan sidadaun bain-bain, laiha lia ida ke muda situasaun, ha’u servi ne’e tenke okupa kargu ida ho kompeténsia rasik,” nia hateten iha Kuartel Jenerál Fatuhada Dili, Tersa (30/08).
Nia dehan, laiha lojika no laiha razaun dehan, Lere Anan Timur, la fasparte iha estrutura FRETILIN nian, nia dehan mós hanesan membru Komite Sentrál segundu jerasaun nian, ne’ebé ke eleitu nia iha fulan Marsu tinan 1981, primeiru Konferénsia Nasionál.
“Ha’u hanoin katak seidauk iha konferénsia seluk, mak disolve estrutura primeiru Konferénsia Nasionál, ha’u laiha komentáriu ba sira ne’e, mais ha’u nu’udar FRETILIN no sein duvida partesipa iha kongresu no iha kongresu mak ami deside,” nia dehan.
Alende ne’e nia dehan, kona-ba kritériu ne’e, nia prenxe liu sira ne’ebé ke iha Komite Sentrál ne’ebá ne’e, so Sekretáriu Jerál Mari ho Prezidente Partidu Lú Olo, mak nia la liu, tanba Lú Olo 24 ano nudar veteranu no mari nudar fundadór, mais sira seluk ne’e nia liu.
“Ha’u bele forma pakote, maibé ha’u seidauk anunsia ofisialmente katak, ha’u atu forma pakote ka la forma, tanba ha’u-nia prinsípiu ne’ebé ke ha’u fila mai FRETILIN ne’e, ha’u atu mai reforsa no haburas ha’u-nia partidu, se buat ruma naksalak ami hamutuk hadi’a,” dehan nia.
Nia informa, iha tempu ida sei hasoru malu ho maun Sekretáriu Jerál Mari Bin Amude Alkatiri, ho Prezidente Partidu Francisco Guterre Lú-Olu, para aseita kestaun sira ne’e.
“Ha’u-nia preokupasaun mak ida ne’e, kongresu tenke la’o hakmatek no armonia no hadi’a vida partidu”, nia hateten.
Nia afirma, harii partidu ne’e atu ukun la’ós atu buka osan no kadeira, maibé ida ne’e laiha sentidu de estadu.
Ikus nia dehan, nia atu pakote ho eis Primeiru Ministru, Rui Maria de Araújo ne’e, Jose Agostinho Sequeira “Somotxo” mak mai konvida, tanba kestaun konsiderasaun no kestaun Irarkia.
2,491 total views, 3 views today
Bele hare Video Seluk :