DILI (timorpost.com)—Prezidente Repúblika, Jose Ramos Horta, akompaña husi enkarregadu Negósiu Embaixada EUA, Marc Weinstock no mós Ministru Agrikultór, Marcus da Cruz ofisialmente lansa projetu avansa Sistema Ai-han no Nutrisaun (Avansa SAN) hodi promove sistema ai-han no nutrisaun iha Timor-Leste.
“Ha’u hanoin hotu-hotu iha Timor-Leste hatene ona, ha’u nia preokupasaun númeru um mak kona ba agrikultura, seguransa alimentár no nutrisaun, para ita hamate tiha sub-nutrisaun ba kosok oan sira, tanba bainhira kosok oan ida moris la iha inan nia susun-been ou formula ida ne’ebé di’ak no kualidade ba kosok oan sira ne’e atu hetan asisténsia, hahán di’ak, depois liu tiha fulan neen, komesa bele han buat ruma no kualidade, sei la han sufisiente entaun la iha kualidade, nia kakutak la dezenvolve,” dehan xefe estadu Jose Ramos Horta ba jornalista hafoin remata Lansamentu ba projetu avansa Sistema Ai-han no Nutrisaun iha Suai Room, Timor Plaza, Kuarta (20/03).
Xefe Estadu ne’e haktuir, dezenvolve kompletu ba nutrisaun ne’e tenke hetan kedas husi inan nia susun-been, inan nia susun-been la iha tenke hare formula, depois too fulan neen fornese hahán didi’ak, se lae sosiedade no povu fraku.
Iha fatin hanesan, enkarregadu Negósiu Embaixada EUA, Marc Weinstock hatete USAID ninia projetu Avansa Sistema Ai-han no Nutrisaun (SAN) ho valor millaun $15 ba tinan lima, hodi promove Timor-Leste ninia sistema ai-han hadi’ak nutrisaun no hametin seguransa ai-han iha nasaun ho foku ba iha munisípiu sira.
“Avansa SAN sei promove prátika agrikultura ne’ebé adapta ho klima, diversifikasaun ai-horis, apoiu ba empreza ki’ik no média agro-alimentár sira, kampaña iha nivel komunidade kona bá diversidade ai-han no advokasia ba hahalok saudável hodi hadi’ak nutrisaun ba ema hotu. Atividade ne’e sei fornese mós asisténsia espesiál ba agrikultór eskala ki’ik no feto, liu-liu ba inan isin-rua no labarik ho tinan lima ba kraik, atu asegura asesu ba ai-han nutritivu”. Haktuir enkarregadu.
Nia haktuir, atividade Avansa SAN ne’e, lansa iha tempu pertinente tanba hanesan kontinuasaun husi investimentu anterior Estadus Unidus nian iha setór agrikultura no inklui tan aspetu balun hodi tau importánsia ba urjénsia kombate mal-nutrisaun, espesiálmente ba inan-feton no labarik ho tinan lima ba kraik,” dehan nian.
Avansa SAN sei implementa husi National Cooperative Business Association CLUSA International (NCBA CLUSA) ho kolaborasaun husi grupu agrikultór ruanulu-resin-hitu iha suku sanulu-resin-ha’at iha munisípiu ha’at. Atividade ida ne’e sei harii aliserse ba progresu, prosperidade no hadi’ak nutrisaun ba inan inklui ki’ik oan sira.
Entretantu projetu avansa Sistema Ai-han no Nutrisaun (Avansa SAN) sei foka uluk ba iha Munisipiu sira hanesan Aileu, Dili, Ainaru inklui Ermera.
4,284 total views, 3 views today
Bele hare Video Seluk :
Subscribe to Timorpost
