DILI, (timorpost.com) — Komandu Polísia Nasionál Timor-Leste (PNTL) munisípiu Dili orienta ona Komandante Seksaun Operasionál halo patrullamentu rigurozu no extra-ordinária iha kapitál Dili hodi garante estabilidade iha loron boot sira atu nune’e ema hotu bele livre festeza Natál no simu tinan foun.
“Ami-nia membru seksaun operasionál prontu, i ami hetan orientasaun husi komandu munisípiu Dili, ne’ebé ami sei halo patrolla extra-odinária iha sidade Dili, atu asegura loron boot sira hanesan 28 Novembru, selebra Natál 2023, no simu tinan foun 2024, para ema la’o livre, iha páz no estabilidade atu selebra loron boot sira ne’e”, Komandante Seksaun Operasionál PNTL munisípiu Dili, Inspetór Xefe Polísia Jose Luis Amaral, informa ba Timor Post iha kuartél PNTL munisípiu Dili, Kaikoli, Kuarta, (22/11/2023).
Tanba ne’e, Inspetór Xefe Polísia Jose Luis Amaral, hatutan, “Patrullamentu ida-ne’e sei halo rigurozu, tanba involve Unidade Polísia Espesiál, Unidade Polísia Marítima ho forsa armada Polísia Militár, nune’e mós parte servisu informasaun sekreta, ita sei tuun, ajuda malu atu garantia estabiliade iha sidade Dili”.
Durante patrullamentu konjuntu ne’e, koordena mós ho PNTL eskuadra sira hodi haree joven sira ne’ebé nakar, hemu tua iha fatin públiku, joven sira ne’ebé gosta provoka situasaun, gosta tuda malu, gosta halai motorizada ho kanu-resin, halai karreta la tuir kódiku estrada, sei atua hotu.
Nune’e Komandante Seksaun Operasaun PNTL munisípiu Dili apela “Dala ida tan ba sidadaun hotu-hotu, liuliu ba joven sira, di’ak liu kontribui, kondúz motorizada ho karreta karik kumpri kódiku estrada, labele halo provokasaun, labele hemu tua iha fatin públiku, hemu iha fatin lanu toba, labele tuda malu, mas la kumpri maka ami-nia membru iha operasaun ne’e ka’er kona, sei simu ninia konsekuénsia”.
Iha nasaun demokratiku, ema hotu livre atu halo movimentu hodi selebra loron boot sira ne’e, see ema ruma halo impedementu ba ema seluk nia liberdade atu partisipa iha eventu 28 Novembru, selebrasaun Natál no simu tinan foun 2024 nian, forsa konjunta iha operasaun extra-ordinária sei la tolera aktu krime sira ne’e.(*)
2,312 total views, 3 views today
Bele hare Video Seluk :
Subscribe to Timorpost
