DILI (Timor Post)- Polísia Nasionál Timor-Leste (PNTL), Munisípiu Dili liuhusi Eskuadra Dom-Aleixo, sei loke jogu futsal ba Artemarsias no ritual sira, hodi halo amizade.
“Ami sei planu mahutuk ho Lider Artemarsias sira hotu hodi ko’alia kona-ba atividade Desportu, jogu amizade Futsal ninian hodi komemora loron boot sira,” dehan Komadante Eskuadra PNTL Dom-Aleixo, Inspetór Xefe, Alex da Costa “Samurai”, iha nia servisu fatin Ai-mutin, Sesta (06/08).
Nia dehan, jogu ne’e Artemarsias sira labele ketak-ketak, hanesan klube karik, iha klube ida mebru Arte Marsiál Sira ne’e iha laran hotu.
“Labele hanesan PSHT ketak ka klube mesak no Kera Sakti klube ida mesak ne’e laiha, maibé klube ida iha mebru PSHT, KORK, IKS no 77 iha laran hotu,” nia hateten.
Alex subliña, palnu iha ona, jogu ne’e sei realiza iha tempu badak nia laran, no sei kontinua realiza beibeik, ba Arte Marsiál Sira iha Postu Administrativu Dom-Aleixo ninian.
“Ohin mós ami akumula hamutuk sira hodi halo limpeza Jerál iha área Dom-Aleixo ninian, hodi komemora no preparasaun ba loron 20 de Agostu, no hatudu sira-nia patriotizmu no nasionalizmu hanesan timoroan,” nia afirma.
Eis Komadante Eskuadra Cristo-Rei ne’e reforsa, limpeza ohin Artemarsias sira halo ne’e tanba inisiativa mai husi sira rasik no sira-nia lider sira hatama karta mak ohin sira konsege realiza duni atividade ida ne’e.
Tuir observasaun ne’ebé Timor Post, atividade limpeza ne’e partispa husi Artemarsias sira hanesan PSHT, KORK no IKS inklui ho arte Rituál 77, ne’ebé hahú limpeza husi Eskuadra PNTL Dom-Aleixo Ai-mutin, ba to’o iha Palásiu Prezidensiál Bairru-Pité, tesik fali mai to’o iha Delta.
1,893 total views, 3 views today
Bele hare Video Seluk :
Subscribe to Timorpost
