DILI (timorpost.com)— Na’in ba kafetaria Katuas Patricio Coffee, iha Aeroportu Internasionál Nicolau Lobato Dili, Afonso da Costa Patricio, preokupa makas ho atividade negósiu Ilegál, ne’ebé tenta hamate ka halakon kafetaria hirak selu taxa ba Estadu iha Aeroportu.
“Problema barak mak ami hasoru durante ne’e iha ami nia atividade Negósiu iha Aeroportu Internasionál, primeiru taxa, iha Aeroportu ami lubuk mak hala’o atividade negósiu kafetaria, kada fulan ami selu taxa ba Estadu ho montante USD 64, taxa ida ne’e sai todan boot ba ami se bainhira rendimentu tama menus ami sei la atinje too iha ne’e, tanba atividade negósiu Ilegál mai taka tiha dalan hodi tenta hamate ami nia negósiu,” Na’in ba kafetaria, Afonso da Costa, hato’o preokupasaun hirak ne’e ba Timor Post iha nia knar fatin Aeroportu Internasionál Nicolau Lobato Dili, Kinta (07/12).
Nia preokupa tanba foin lalais, iha taxi privadu ida lori produtu oioin kompostu hosi kafé, hahán, bee no bebidas fan iha Aeroportu ho presu ne’ebé mak normal, negósiu ida ne’e fó impaktu boot ba negosiante sira iha Aeroportu laran.
“Durante ne’e, ami ne’ebé loke kafetaria iha Aeroportu laran, la hetan rendimentu, hakfodak negosiante balun ho kedas sira nia transporte lori hahán mai fan iha li’ur ne’ebá, atividade ne’e la selu taxa ba estadu, ida ne’e fó mate ka fó todan ba ami hirak ne’ebé selu taxa ba estadu,” nia hato’o.
Nia dehan, ema li’ur lori hahán mai fan iha area Aeroportu, ho presu normal, ezemplu bee aqua 0,25 fan ho presu normal, no kafetaria sira iha Aeroportu laran fan ho presu 0,50, ema sei hili liu mak ida 0,25 Centavu duke ema sosa 0,50 Centavu.
“Ami preokupa mak taxi ida lori hahán mai fan iha li’ur ne’ebá ho presu normal, bee aqua 600 ml litru ne’e nia fan 0,25 Centavu, ami iha laran mai fan 600 Ml presu 0,50 Centavu, ema atu hili mak ida ne’ebé entaun ema tenke hili ida presu normal, situasaun ne’e fó impaktu boot ba ami, loroloron ami hetan rendimentu menus, depois taxi ne’e mai fan totalmente ami la hetan kedas rendimentu, oinsá mak ami atu prepara osan selu taxa,” nia hato’o
Tanba ne’e husu ba Aeroportu no Navegasaun Aérea Timor-Leste, Empreza Públika (ANATL, E.P), atu toma didi’ak responsabilidade, tanba sira nia servisu mak ida ne’e atu hare ema hirak ne’ebé mai fan sasán la tuir prosedimentu ANATL,E.P, fó tanba kafetaria, restaurante iha Aeroportu laran maioria selu hotu taxa ba estadu.
“Situasaun ne’ebé hanesan, ami hasoru tiha ona, momentu ne’ebá iha kios tolu mak iha li’ur ne’ebá sira la sente saida mak taxa, sira fan presu normal, ne’e mós fó problema boot ba ami, tanba ami la hetan rendimentu ami atu selu taxa, selu traballadór no sosa sasán atu rai iha kafetaria laran osan mak la too, obriga ami tenke hasai ami nia osan privadu hodi taka filafali,” nia preokupa.
Tanba ne’e mak ezije ba ANATL,E.P, no ema ne’ebé responsabilidade másimu iha Aeroportu ne’e atu tau atensaun.
Nia afirma, atu ko’alia kona-bá rendimentu triste tebes, tanba rendimentu tama depende ba pasajeiru, tanba kafetaria iha Aeroportu barak, kada loron ida hetan rendimentu sorte di’ak bele hetan too USD 90, sorte laiha dala ruma hetan de’it USD 10.
Ema ne’ebé tama iha kafetaria maioria Timoroan ne’ebé fila hosi rai li’ur mai ho nia família mak kompras barak liu, entaun pasajeiru ema estranjeiru ladún kompras.
Entretantu Timor Post tenta konfirma ho Autoridade ANATL,E.P, maibé laiha fatin tanba feriadu.
1,224 total views, 3 views today
Bele hare Video Seluk :
Subscribe to Timorpost
