Reporter Venydora Maria Oliveira/Editor Isal Ermelita
DILI—Diretór Asia Justice and Rights (AJAR), José Luis de Oliveira, lamentavel ho statementu Primeriu Ministru ne’ebé defende Timor-Leste atu partisipa iha Expo internasionál Dubai ne’ebe hala’o iha Dubai.
Tuir nia, difisil atu kansela tanba Timor investe ona tempu no rekursu, oinsá atu partisipa iha expo internasionál ne’e.
“Uluk dehan, hisik kosar maka ukun aan ne’e, agora ita haree atu kontrariu fali, se ita koalia loloos investimentu ne’e, investimentu iha rai laran, ba Dubai ne’e o ba fa’an saida, kondisaun rai laran laiha, povu barak kiak hela,” José hatete ba Timor Post, Dominggu (13/06).
Portantu, nia parte la konkorda ho statementu PM nian dehan atu promove TL hodi nasaun seluk bele konese, ne’e la’os razaun tanba Timor-Leste nia embaixada iha nasaun barak no promove Timor, ne’e papel diplomata nian.
“Ha’u la aseita ho ida ne’e, governu ida ne’e maka laiha atu promove ita Timor-Leste, kestaun Dubai, la’os presiza tuir expo Dubai, ita iha embaixador misaun diplomatiku barak,” nia hateten.
“Sira nia servisu principal ne’e maka promove Timor, la’os ho expo, ita presiza buat kiik oan neneik ba maka nia foin to’o iha ne’eba, hakarak atu promove nasaun ne’e liu hosi servisu diplomata sira.”
Iha parte seluk, estudante finalista hosi Universidade da Paz (UNPAZ), Departamentu Relasaun Internasional, Ivete Moniz hatete, expo internasionál ne’e la’ós foin Expo Dubai deit, maibé iha barak ona no timor sempre partisipa, ne’e diak, maibe governu nunka aprezenta benefisiu fundamental saida mak Timor hetan ona.
“Presiza halo avaliasaun hosi expo sira ne’ebe maka ita tuir ona ne’e, iha ka la’e benefisiu sira, se laiha nusa mak ita tenke partisipa hela de’it,” nia hakotu. (Lee Notísia Kompletu iha Jornál Diáriu Timor Post)
538 total views, 9 views today
