DILI, (timorpost.com)— Prezidente Autoridade Munisipál (PAM) munisípiu Dili, Gregório Saldanha, rekoñese públiku preokupa lixu fatin ne’ebé kompañia sosa daudauk ne’e forma hela iha Kaikoli no seidauk entrega ba PAM Dili.
Públiku preokupa sasán hirak ne’e forma de’it iha Kaikoli maibé la halo distribuisaun, tanba lixu fatin ne’e hola kedas iha mandate Governu Konstitusionál da-IX nian.
“Ami to’o agora seidauk halo distribuisaun lixu fatin ba fatin-fatin tanba kompañia seidauk entrega mai iha autoridade munisípiu Dili, sei iha kompañia nia-liman, nune’e mós akordu ne’e la’os ha’u-nia tempu maibé akordu ne’e iha kedas governu anteriór, VIII governu nia tempu, sira kontratu ho kompañia ne’ebé manan projeitu ida halibur lixu ne’e”, dehan Gregório ba jornalista sira hafoin partisipa iha serimónia asinatura ba asisténsia finansiamente projeitu iha embaixada Japaun, Kampu Alor, Sesta, (22/03).
Nia hatutan, “Iha kontratu ne’e inklui mós ekipamentu sira ne’e autoridade munisípiu Dili bele prepra hela fatin hodi rai, hanesan agora rai hela ne’e, maibé sira husi parseira ho kompañia lokál PAX maka tau-matan ba lixu ne’e, kuandu aat mós responsabilidade sira nian. Ami hakarak sira entrega ekipamentu sira ne’e mai ho kondisaun di’ak, ne’ebé agora iha hela sira nia-lima, ami ezije nafatin atu sira-nia instalasaun no sira-nia servisu preparsaun para atu instala ekipamentu moderna halibur lixu ne’e, bele la’o lalais”.
Prezidente autoridade Dili ne’e mós hala’o ona vizita ba lixu fatin iha Tibar maibé to’o agora moru seidauk hale’u hotu.
“Ha’u ba vizita to’o iha Tibar, sira halo apresentasaun ba konsellu ministru katak buat hotu, hotu ona, moru hale’u hotu, maibé ha’u ba vizita iha ne’eba buat laiha, sira halo duni servisu balun mais la hanesan sira aprezenta ba iha komsellu ministru ne’e”, nia akresenta.
Tanba ne’e, autoridade munisípiu Dili sei hola medida rezidas atu inpoin ou buka dalan seluk atu lalais, tanba problema lixu ne’e sai perioridade, no idetifika lixu sai problema númeru dahuluk kedas, tanba ne’e Prezidente autoridade prometidu atu rezolve lixu iha kapitál Dili.
Entretantu públiku preokupa tanba daudauk ne’e kapitál iha problema kona-ba lixu fatin maibé lixu fatin forma de’it iha Kaikoli, seidauk distribui ba fatin sira iha Dili laran, atu nune’e komunidade bele soe lixu ba laran.(*)
3,699 total views, 30 views today
Bele hare Video Seluk :