DILI (timorpost.com)—Primeiru-Ministru, Kay Rala Xanana Gusmão partisipa diskusaun kona-ba fundus imprestimu husi Banku Mundial ne’ebé governu sei uza hodi finansia dezenvolvimentu infraestrutura iha Timor-Leste.
Ministru Planeamentu no Investimentu Estratéjiku (MPIE), Gastão Francisco de Sousa informa, enkontru ne’e hodi atualiza programa governu nian foka ba área prioridade tolu hanesan, dezenvolvimentu infraestrutura setór edukasaun, saúde no programa bee moos nian.
“Ohin ami diskute asuntu tolu kona-ba imprestimu iha área bee moos nian, saúde no edukasaun. Ami troka hanoin, tanba fundus imprestimu ita halo durante ne’e la iha estudu ida di’ak, ita husu osan no halo de’it projetu barak paradu kedas hosi 2001 too 2022 projetu barak la halo. Dehan Ministru Planeamentu no Investimentu Estratéjiku (MPIE), Gastão Francisco de Sousa ba jornalista sira hafoin remata reuniaun iha Palasiu governu, Sesta (22/03/2024)
Governante ne’e haktuir, Orsamentu ba fundus imprestimu hosi Banku Mundial ne’e rasik governu foti ona iha tinan 2021 no 2022, maibé too agora seidauk implementa hodi halo projetu barak la’o paradu.
“ Kona ba montante husi osan ne’ebé empresta atu uza hira, ita seidauk bele klarifika tanba prosesu diskusaun foin maka hala’o hodi hein ministériu relevante sira informa relatóriu ba xefe governu maka sei deside”.
Nia haktuir, kona-ba projetu bee moos nian labele avansa lai, hein estudu tenke halo didi’ak lai, no saúde ita hein preparasaun orsamentu 2025 foin ita deside projetu atu la’o oin nusa no kona ba edukasaun sei hein planu asaun annual hosi Ministériu Edukasaun depois mak bele realiza.
“Projetu bee moos tuir planu governu nian, sei halo iha Dili Leste, Dili Weste no Munisípiu Baukau no fatin seluk tan. Enkuantu saúde no edukasaun sei implementa iha área importante sira ne’ebé governu hala’o ona identifikasaun iha terrenu”. Nia informa.
Entretantu iha diskusaun kona-ba fundus imprestimu husi Banku Mundial iha Timor-Leste, Primeiru Ministru hetan akompaña hosi Ministra Finansas, Santina José Rodrigues F. Viegas Cardoso, Ministru Planeamentu no Investimentu Estratéjiku (MPIE), Gastão Francisco de Sousa, Ministru Obras Publika, Samuel Marçal no Ministru Transporte no Komunikasaun (MTK), Miguel Marques Gonçalves Manetelu ho Diretór Banku Mundial Bernard Harbone.
4,965 total views, 9 views today
Bele hare Video Seluk :
Subscribe to Timorpost
