DILI (timorpost.com)—Komisaun Nasionál Eleisaun (CNE-sigla Portugés), fó ultimatu ba Partidu Polítiku (ParPol), hothotu atu bele hamoos atributu iha fatin públiku, no informa Kazu eleitorál haat mak submete ona ba iha Ministériu Públiku (MP).
“Agora ba oin haree imi nia panfletu sira no sasán sira ne’ebé taka iha fatin-fatin, haree atu hamoos ona,” Prezidente CNE, José Agostinho da Costa Belo, deklara liuhosi ninia diskursu, iha Salaun Lanine Larigutu, CNE Kolmera, Tersa (30/05).
Nia haree ba votu nulu ne’ebé atinje rihun 10 ne’ebé ParPol hothotu tenke halo edukasaun sívika ka ezame ba votante sira klaru nune’e votu barak labele soe de’it.
“Husu ba partidu sira katak hanorin mós ita nia militante sira atu partisipa másimu iha edukasaun, polítika tenke iha responsabilidade nu’udar papél importante ba partidu hotu-hotu”, nia rekomenda.
Tanba Eleisaun Parlamentár liu ona semana ida no rezultadu provizóriu hatudu partidu CNRT mak hetan kadeia 31, FRETILIN kadeira 19, Partidu Demokrátiku, kadeira 6, KHUNTO kadeira 5 no PLP kadeira 4 inklui partidu seluk ne’ebé laliu barreira 4%.
Alende kona-ba observasaun internasionál husi Comunidade dos Paises da Língua Portuguesa (CPLP), organizasaun g7+ no Uniaun Europeia inklui seluk tan, hatudu katak ElPar iha Timor-Leste la’o iha demokrasia nia laran.
Submete Kazu Eleitorál Haat
Prezidente CNE, José Agostinho da Costa Belo, mós informa prosesu monitorizasaun ba atividade kampaíña eleitorál no Eleisaun Parlamentár tinan ne’e, rejista krime eleitorál hamutuk 11. Hosi númeru ne’e, krime 7 aplika de’it sansaun administrativu, no krime haat seluk, órgaun eleitorál haruka ona ba Ministériu Públiku (MP) atu prosesa tuir lei.
“Iha duni keixa reklamasaun hamutuk 11 no 7 ita konsidera hanesan administrativu, ita rezolve kedas, fó kedas resposta, iha keixa 4 maka kategoria atu partisipa ba Ministériu Públiku, ida labarik maioridade tuir mós votasaun, ita tenke investiga nune’e bele hatene sé maka fó. Iha mós ema estranjeiru balu ne’ebé tentativa no halo hela prosesu ida ne’e. Ita prosesa no tan kazu balu ne’ebé uza ema nia kartaun ba vota, prosesu tomak ita haree hela, ita hakarak dehan transparénsia”, nia informa iha Salaun Lanine Larigutu CNE, Kolmera, Tersa (30/05).
Tanba krime eleitorál hirak ne’e, komete no envolve hosi Partidu Polítiku sanulu-resin-hitu, ne’ebé foin daudaun kompete iha ElPar, alende militante, apoiante no simpatizante sira hotu, mak durante partisipa iha atividade kampaíña eleitorál durante fulan ida, ne’ebé hahú husi loron 19 fulan Abríl to’o 19 fulan Maiu 2023.
Krime sira ne’e sei prosesu tuir dalan legál, la’ós ne’e de’it, presiza mós halo investigasaun hasoru sidadaun estranjeiru sira ne’ebé deklara sira asesu hotu kartaun eleitorál Timor nian, karik iha ema ruma ka ParPol ruma mak fasilita.
Demokrasia iha Timor-Leste la’o tuir dalan, laiha krime grave ruma, maski iha indivíduu balun ne’ebé seidauk komprende, maibé sidadaun maioria komprende kona-ba demokrasia iha nasaun Demokrátiku ne’e.
ParPol sira ne’ebé kompete iha ElPar sei iha oras 48 hodi halo reklamasaun, molok submete akta apuramentu nasionál ba Tribunal Rekursu (TR), hodi halo validasaun no públika iha Jornál da Repúblika.
“Sei iha tan tempu oras 48 sura husi ohin (horisehik) too bainrua (aban), se partidu seluk iha deklarasaun ruma iha tempu ne’e rekorre ba sira”, nia hateten.
Nia mós agradese ba entidade hotu, liuliu Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL), mídia nasionál sira inklui observadór nasionál no internasionál sira ne’ebé akompaña festa demokrasia, hahú husi kampaíña eleitorál to’o ElPar, nune’e mós sidadaun hotu ne’ebé partisipa másimu iha eleisaun ne’e.
1,832 total views, 3 views today
Bele hare Video Seluk :
Subscribe to Timorpost
