DILI (timorpost.com)-Diretór Eskola Pre-Sekundária Públiku 10 Abríl Gleno, munisípiu Ermera, Felisberto dos Santos, tau esperansa ba governu foun liuhusi Ministériu Edukasaun, Juventude Desportu (MEJD), atu rekruta tan profesór no apoiu fasilidade ba eskola sira.
“Ami husu ba governu foun liuhusi MEJD, ba oin rezolve setór edukasaun hodi rekruta profesór matéria matemátika, ingles, no portugés no apoiu fasilidade hanesan meza no kadeira,” nia hateten ba Timor Post, bainhira partisipa semináriu iha salauan Centro Nasionál Chega Balidi, Tersa (30/05).
Nia dehan, profesór sira ba matéria tolu ne’e importante tebes atu bele halo transformasaun ba estudante iha primeiru ano to’o terseiru ano.
“Durante ne’e ami hasoru difikuldade mak menus profesór matéria tolu ne’e,” nia hateten.
Nia haktuir, ho kestaun falta profesór ne’e, obrigadu sira tenke fahe mós tempu iha oras lokraik tuku 1:45, hodi hanorin estudante sira.
Aleinde ne’e, nia dehan iha eskola ne’e mós enfrenta hela problema menus fasilidade hodi apoiu estudante sira atu bele partisipa iha prosesu aprendizajen ne’ebé di’ak hodi bele atinje mehi ida kualidade edukasaun ne’e.
“Menus fasilidade kadeira-meza, entaun difikulta mós prosesu aprendizajen iha aula laran ladún la’o ho di’ak, maibé sira sempre fahe oras estudante balun tama eskola iha oras tuku 8:30 to’o 12:30 hodi sira seluk kontinua ba loro-kraik nian,” nia informa.
Nia dehan, maski hasoru difikuldade menus profesór, menus sala de aula no kadeira-meza, maibé la hamate sira nia vontade atu firme nafatin iha prosesu aprendizajen nian.
“Ami sempre jere tempu ho di’ak atu nune’e bele akumula hotu estudante sira hodi partisipa iha prosesu aprendizajen iha sala laran ho másimu,” nia afirma.
Enkuantu iha eskola refere ho nia profesór hamutuk 40, profesór permanente na’in-30 no profesór kontratadu no voluntária na’in-10, no mós eskola refere ho nia aula hamutuk 17 ho nia estudante hamutuk 1132.
Iha fatin ketak, Diretór eskola sekundária públiku Nino Coni Santana Gleno munisípiu Ermera, Clementino Monteiro, hato’o mós preokupasaun hanesan iha eskola refere menus sala de aula hodi fasilita estudante sira partisipa iha prosesu aprendizajen.
“Durante ne’e ami hasoru difikuldade iha eskola refere menus sala de aula, estudante husi primeiru ano to’o terseiru ano, rihun rua resin, kada sala ida akumula estudante 60-100, entaun difikulta profesór sira atu kontrola másimu iha sala laran,” nia aprezenta.
Nia dehan, ida ne’e sai dezafiu boot ba profesór sira atu kontrolu iha sala laran, maibé profesór sira nafatin esforsu an liuhusi maneira oi-oin fahe oráriu eskola nian ba estudante balun tama aula iha oras dadeer no balun tama aula iha oras lokraik nian, atu nune’e estudante sira bele partisipa másimu iha sala laran.
“Tanba ne’e mak ami husu ba MEJD foun iha polítika ne’ebé di’ak mak konstrusaun tan sala de aula no mós apoiu mós fasilidade kadeira-meza eskola hodi estudante bele uza hodi partisipa iha prosesu aprendizajen,” nia subliña.
Ikus nia rekoñese, foin daudauk ne’e MEJD halo konstrusaun edifísiu ba Profesór, Diretór, Sala GAT no sala Koziña, hodi fasilita de’it profesór sira, maibé estudante laiha sala de aula.
1,653 total views, 6 views today
