DILI, (timorpost.com)— Kronolojia ne’ebé kolega matebian, Mateus da Cruz, nu’udar sasin iha akontesimentu ne’e konta katak, akontesimentu ne’e akontese mais ou menus tuku 2 madrugada bainhira meti hamutuk iha Área Branka.
Alito da Gama hamutuk ho nia kolega sira tama tasi laran iha tuku 11 ou 12 hanesan ne’e, sira tama tasi ho ema barak maibé la’o keta-ketak, Alito da Gama ho Mateus da Cruz mak la’o tuir, deripenti de’it tasi boot entaun sira book-an ladi’ak, tanba forsa laiha nune’e monu tuun.
Husi akontesimentu ne’e sasin ne’e dehan nia mak kaer nia kolega Alito da Gama nia liman aproveita dayung ka nani ba tasi-ninin maibé la to’o iha tasi-ninin, Alito hamriik hela iha fatuk ida nia-leten no nia kolega sai ba liu hodi husu ajuda.
“Ami Tama tasi iha jam11 ou 12 sira ne’e, maibé ami tama ne’e ema barak mais ami la’o ne’e ketak-ketak, hanesan sira balun uluk tiha ona no ami mak tuir, entaun ami rua la’o tuir mai mak derepenti tasi mós boot ba daudauk entaun ami rua mós forsa laiha ona, entaun nia monu tuun, Ha’u mós dada nia-liman, no kontinua dayaun (nani-red) nafatin to ha’u sama kona ona fatuk, ha’u haruka nia hamriik no ha’u dehan katak tau senter ho oklu tasi ne’e iha o nia ulun atu nune’e ha’u sai lalais ba buka ema hodi mai ajuda fali o iha fatin ida-ne’e”, Mateus da Cruz, konta tuir horseik, Domingu, (17/03).
Nia hatutan, “Entaun ha’u tuun mai ladi’ak entaun ha’u sa’e fali ba, ho ida-ne’e ha’u hetan maun ida ho senter ne’ebé ho kedas, ha’u mós ba husu ajuda ba nia entaun nia hatan katak, nee só ho ró mak di’ak, entaun ha’u tuun ba iha Manurade nian hodi husu ajuda ba maun na’in-2 iha ne’eba, no sira ba haree tuir, só hetan mak senter ho sinelus de’it, iha fatin ne’ebé mak ohin vítima hamriik ba, nia mout no lakon loloos ne’e iha tuku 2 madrugada ne’e”.
Ekipa konjunta kompostu husi Unidade Polísia Marítima (UPM), Bombeiros, Krus Vermella, hamutuk ho peskadór no família vítima ohin, Segunda, (18/03) konsege hetan ona mate isin Alito da Gama (18), ne’ebé mout iha tasi, Área Branka.
Matebian Alito da Gama mout iha tasi horseik (17/03) madrugada iha tasi Área Branka bainhira hamutuk ho nia kolega sira ba meti iha área refere.
Matebian nu’udar estudante ida husi Eskola Pre-Sekundária SMP 6, Dili.(*)
3,879 total views, 3 views today
Bele hare Video Seluk :
Subscribe to Timorpost
