DILI-Prezidente Partidu CNRT, Kay Rala Xanana Gusmão husu ba feto neébé assosia iha Organizasaun Mulher Partido OMP CNRT, atu realiza diskussaun kada temátika depoiz eleisaun parlamentár tinan 2023.
Pedidu nee aprezenta iha Sábadu fim de semana (11/03), durante konsolidasaun nasionál partidu CNRT neebé realiza iha salaun Katedral Dili.
Ho hanoin ida, OMP depoiz eleisaun, imi sei buka halao karik mapeamentu ba rekursu humanus husi OMP rasik, para ita bele iha diskussoes, laos buat hotu hamutuk. Mais diskussaun kona-ba area ida-idak, se hau turizmu mak imi bolu hau koalia seguransa, diak-liu imi halo seguransa, hau halo turizmu, tanba imi nia tema nee, hodi kontribui, ho hanoin, karik iha àrea ruma, ita bele kontribui ho espesiénsia, karik iha area seluk imi bele kontribui ho matenek, para ita fokus, Tenik Xanana Gusmão.
Líder Nasionál nee mos husu atu evita diskussaun kona-ba forsa no polísia, tanba feto sívil labele deskuti kona-ba area temátika rua nee.
Iha loron internasionál neebé realiza iha loron 8 fulan Marsu foin lalais nee, partidu CNRT la realiza eventu espesiál ruma, tanba nee, Xanana Gusmão mos fó ba hanoin ba OMP, atu atu iha eventu espesífiku ruma.
Los duni, matéria neebé imi iha, matéria boot teb-tebes, katak, depois de eleisaun karik laos tinan ida ne e, tinan mai ne e, ita tenke halao ita nia kongressu, Foin dadaun, iha loron 8 fulan marsu liu ba, ita ladun boo- an, iha servisu barak, maibé iha tinan mai ne e, buka koñese liu-tan partidu CNRT, iha dia 8 de Marsu (2024) favor ida, OMP arranja dokumentu ne ebé iha, Tenik.
Tuir Xanana Gusmão, konsolidasaun Organização Mulher Partido OMP durante loron ida (11/03), la sufisiente atu deskuti hotu, assuntu kona-ba dezenvolvimentu inkluzivu, integradu no sustentável neebé konta ho envolvimentu forte husi inan-feton sira.
Atu kontribu ba dezenvolvimentu integradu ne e los, maibé presiza loron tolu mak sai husi ne e, hau sente katak, imi ladun sukat, kbiit atu halo buat sira ne e hotu, ita bolu atensaun ba malu deit, envolvimentu feto iha polítika, dezenvolvimentu , feto iha edukasaun, saúde, ekonomia, agrikultura, veteranu, ambiente, finansa, ema ho difisiensia, assuntu labarik, turizmu, assuntu parlamentares, seguransa mídia infraestruturas, dezenvolvimentu mais inkluziva, funsaun públika, Munisípiu, Hateten.
Tanba nee, Prezidente CNRT husu atu haruka dokumentu (Ajenda Prioritária husi OMP) ba Komissaun Polítika Nasionál CPN, hodi realiza enkontru alargadu iha iha Dezembru tinan 2023 ka Janeiru 2024, hodi deskuti klean area hirak nee.
Konsolidasaun Nasionál OMP nee partisia husi estrutura feto mai husi munisípiu 13 no Autónoma Oecusse no tanba nee, Koordenadora Jerál Organização Mulher Partidu OMP, Veneranda Lemos deklara katak, prontu atu exekuta orientasaun husi kuadru superiór partidu nian.
“Mai ita hametin ita-nia fileira, hodi halao nafatin orientasaun husi CPN no husu estrutura tomak partidu CNRT nian, atu bele konkretiza missaun neébe ita hakarak manaan ho maioria absoluta iha eleisaun parlamentar tinan 2023, Ita-hotu, tau nafatin rai iha laran katak, Xanana amigo, o povo está contigo, Deklara Veneranda Lemos.
Iha parte seluk, Sekretáriu Jerál Partidu CNRT, Francisco Kalbuady Lay, tau fiar iha estrutura Organização Mulher Partido OMP, hodi manaan ho maioria absoluta iha eleisaun parlamentar tinan nee.
Konsolidasaun, nee kapas teb-tebes, apresia liu-liu sira husi Munisípiu hotu-hotu, iha mos ita nia-feton sira husi komponente ida-idak, imi hotu sai forsa ba partidu, liu-liu OMP, iha buat ida mak hau hameno ba ita boot sira, eleisaun falta deit fulan ida liu, kauze fulan rua, imi prontu atu kontribui, atu CNRT tenke manaan ho absoluta, minimu 33 kadeira, feto iha aumentu kadeira lima Dezafia Francisco Kalbuady Lay ba estrutura OMP.
Tanba nee, Sekretáriu Jerál Partidu CNRT husu ba OMP no mos estrutura partidu nian, atu mantein komunikasaun no koordenasaun, iha nível hotu-hotu partidu nian, hodi alkansa vitória eleisaun parlamentar.
“Iha dia 21 de Maiu, komesa agora too dia 21 ita-boot sira mai husi Munisípiu, RAEOA, nasionál sira-hotu, servisu hamutuk, halo koordenasaun, komunikasaun diák toó iha kraik, husi baze NUREP, CELCOM too iha Postu, too iha nasionál, haú fiar katak, OMP, feto Partidu CNRT forte duni ona, kria amizade nee frote, imi sai exemplu ba mane, tanba inan mak la iha, ami naín rua Maun Bo’ot (Xanana Gusmão) mos la tuur iha nee, Tenik.
Alkansu ba maioria absoluta partidu CNRT nian, iha eleisaun parlamentar neebé markada ba loron 21 fulan Maiu, mak atu lori Prezidente Partidu nian, Kay Rala Xanan Gusmão, hodi lidera governu foun mai, atu korriji violasaun ba sistema finanseiru husi ukun agora, konkretiza polítika dada kadoras mina mai Timor-Leste no programa seluk neebé sira iha Planu Estratéjiku Dezenvolvimentu Nasionál PEDN.
2,404 total views, 3 views today
Bele hare Video Seluk :
Subscribe to Timorpost
