Dili (Timor Post) – Konsellu Estudante Universitáriu Postu Administrativu Lequidoe (KEUPAL) Munisípiu Aileu realiza Semináriu kona-ba planu asaun no prosesu dezentralizasaun ba Juventude hodi hametin sira-nia unidade no aumenta konesimentu hodi kontribui ativu di’ak liu iha dezenvolvimentu.
Tuir Komisaun Organizadora ba KEUPAL, Odelia Soares, semináriu ohin ho nia tema “Partisipasaun Juventude ba planu Asaun Komunidade iha Prosesu Desentralizasaun”.
“Ohin ami ko’alia kona- ba Juventude no desetralizasaun tanba ita hatene katak ami nu’udar Joven dala-ruma ami iha planu maibé la ko’alia, entaun ami tau iha asaun”, nia hateten hafoin remata Semináriu iha CNJTL, Faról, Sábadu (03/09).
Nia dehan, semináriu ida hahú iha tinan kotuk, maibé nia tema diferente, nune’e ba oin sira sei realiza tan atividade hanesan ne’e.
Iha fatin hanesan Oradór, Lizerio Dias, dehan Semináriu ida ne’e realiza husi Klibur Universitáriu Postu Administrativu Lequidoe, Munisípiu Aileu, atu ko’alia kona-ba asuntu oinsá Juventude nia partisipasaun ativu hamutuk ho Komunidade hodi kontribui ba dezenvolvimentu liuliu preparasaun ba iha prosesu desentralizasaun.
“Nia objetivu atu fahe esperiénsia balun hanesan Oradór oinsá maka fó motivasaun no partila koñesimentu ba Juventude sira atu hametin sira-nia unidade no aumenta sira-nia koñesimentu hodi bele kontribui ativu di’ak liu iha ita-nia dezenvolvimentu”, nia dehan.
Nia Esperansa liafuan lubuk ida katak Joven sira bele iha disiplina, hametin unidade no hadi’a koñesimentu atu nune’e bele servisu hamutuk no kontribui ba dezenvolvimentu liuliu ba pás no estabiidade hodi haburas nafatin kultura diskusaun ne’ebé konstrutivu bele fó hanoin di’ak ba Rai ida ne’e.
“Ne’e duni hau-nia mensajen ikus ba joven sira katak ita nu’udar Juventude futuru nasaun ida ne’e nian, Komunidade sira no Inan-Aman sira esperansa katak ita sei kontribui hodi lori mudansa di’ak ba sira-nia moris, entaun juventude sira presiza hanoin atu estuda makas no halo diskusaun ba solusaun problema ne’ebe presiza autór ba solusiona ita-nia família, an rasik no ita-nia nasaun”, nia hakotu.
1,854 total views, 3 views today
Bele hare Video Seluk :