Reflexaun badak ba Domingo IV Tempo Paskua nian.Act. 4,8-12; Sal. 117; 1Jo. 3, 1-2; Jo. 10, 11-18)
Hosi: Luis Pereira SJ
Kontexto!
Ita tama ona ba Domingo dahát tempo Pakua nian, iha ne’ebé ita celebra Domingo Bibi-Atan Diak/Bom Pastor. Domingo ida ne’e, dedika mós núdar Domingo vokasaun mundial katak hanoin hikas ita nia vokasaun núdar sarani. Nuné, Santa Igreja konvida ita, atu matan fihir metin ba Jesus-Kristo núdar Bibi-Atan Diak ne’ebé iha domin profundo no kuidadu ba ita núdar nia bibi sira. Bibi-Atan Diak katak ida ne’ebé mak tau-matan ba bibi sira moris rasik, ho domin no ho kuidado. Nia serbisu mak atu lori bibi sira ba hetan dút matan no wé naresin. Nia proteje sira atu sira labele lao lakon iha dalan no monu ba asu-fuik sira liman. Nuné, nia tau matan ho diak ba bibi sira. Bazikamente, nia konhese sira no sira konhese nia.
Ponto 3 ita bele reflete hamutuk:
Sakrifisiu Domin!
Núdar Bibi Atan Diak, Jesus konhese didiak nia bibi sira. Nia pronto fo nia moris rasik ba mate atu soi sira. Nuné, Nia proteje sira husi asu-fuik. Nia lori sira ba fatin be iha dút matak no wé barak. Nia buka sira ne’ebé lakon. Nia iha kompaixaun ba sira. Nia hadomi sira. Domin ida ne’e mak revela nia ponto a’as liu iha Kruz hanesan haktuir iha leitura dahuluk husi livro Apostolo sira nia hahalok. Jesus sai tiha fatuk inan. Iha Nia, ema hotu/bibi sira sai Maromak oan hanesan hatuir iha leitura daruak husi São João nia surat. Bibi-Atan Diak mak tenki sai attitude no valor ba ‘pastores’, ukun nain sira. Amu papa Francisco dehan ‘pastores com cheiros de ovelhas/bibi-atan sira ho iss/morin bibi sira nian’.
Konhese malu reciproka!
Jesus rasik dehan “Ha’u konhese ha’u nia bibi sira no sira konhese ha’u”. Deklarasaun ne’e, hatudu konhese malu/hatene malu ida be reciproko katak husi parte rua hotu. Jesus konhese nia bibi sira. Nia bibi sira mós, konhese Nia. Konhese iha biblia signifika RELASAUN INTIMA/KLEAN ida no laós iha nivel kognitivo deít/ulun nian deit.
Relasaun intima ne’e, motiva husi domin ida: Jesus ho nia Abba/Aman. “Hanesan Ha’u Aman konhese Ha’u no Ha’u konhese Ha’u Aman”. Núdar ‘Bom Pastor’, Jesus konhese nia bibi sira. Nia konhese sira tamba Nia moris hamutuk ho sira, Nia buka hatene sira nia terus no susar, nia tulun sira. Nuné, nia konhese sira husi laran. Nia hatudu dalan ba sira liu husi lao iha oin.
Sira rona, konhese, no hatene Nia lian!
Mundu ohin loron, oferese ba ita ‘bibi-atan oin-oin’, lian oin-oin. Ita preciza DISCERNE lian bibi-atan ida lolós nian. Ita preciza hametin ita nia relasaun intima ho Nia atu ita bele facilmente konhese Nia lian no lao tuir Nia besik liu tan. Dalan atu bele konhese nia lian mak BIBLIA regular, halo orasaun bebeik hanesan meditasaun, kotemplasaun nst!
Chamada lao tuir Jesus!
Bibi-Atan Diak konhese Nia bibi sira, sira rona Nia. Nia proteje sira, Nia hadomi sira ho domin gratuita ida. Nuné, Nia bibi sira lao tuir Nia. Lao tuir Bibi-Atan Diak mak bele to’o ba dút matak no wé naresin. Nia rasik dehan “Ha’u sei iha tan bibi luhan seluk; sira la dauk tama iha bibi luhan ida ne’e. Ha’u sei dada mos sira mai”. Nuné, missaun Jesus nian klaru katak lori bibi sira ba Aman Maromak: moris rohan laek. Bibi sira preciza hakiak attitude-valores hadomi, rona, konhese no lao tuir sira nia Bibi-Atan Diak. Jesus rasik dehan: Ha’u mak Dalan, Lia-Lós no Moris.
Ita rezume hodi dehan katak Aman Maromak fo ba ita Bibi-Atan Diak ida atu tau matan ba ita, halo ita sai Maromak oan, tulun lori ita ba Aman Maromak.
Importante atu ita buka rona, konhese no lao tuir Nia. Jesus husu pergunta ba ita: O hadomi Ha’u? Sé o hadomi Ha’u, tau matan ba Ha’u nia bibi sira. Ita reza atu Naí Maromak haraik ba ita ‘Bibi-atan sira ne’ebé tuir amu papa Francisco dehan “pastores com cheiros de ovelhas”. Amen. Amdg!(lupersj)
1,446 total views, 3 views today
Bele hare Video Seluk :
Subscribe to Timorpost
