DILI, (timorpost.com) — Ministru Obras Públikas (MOP), Samuel Marçal, iha nia intervensaun perante konvidadu sira iha serimónia asinatura akordu entre Xanana Reading Room no Fundasaun Kay Olok, ne’ebé asina direita husi Priméiru Ministru (PM), Kay Rala Xanana Gusmão, ho nia oan mane Kay Olok Sword Gusmão, hatete, sente konfuzaun fó Konsellu ka Assesór ba Kay Olo tanba daudauk ne’e Kay Olok mós nu’udar Assesór iha Ministériu Obras Públikas.
“Ha’u Horisehik lokraik (19/11/2023), sinhor Abilio ba iha Ha’u nia edifísiu (MOP), ba ha’u-nia servisu fatin, husu ha’u dehan atu mai assesór ba Kay Olok, ha’u dehan iha ne’e nia (Kay Olok-red) maka ha’u nia assesór, agora ha’u ba ne’ebá ha’u mak assesór fali ne’e, ami na’in rua ne’e ha’u atu ko’alia saida ba nia”, Ministru MOP, Samuel Marçal, hatete liuhosi serimónia asinatura, iha salaun Xanana Reading Room Lesidere-Dili, Segunda, (20/11/2023).
Husi deklarasaun ne’e hetan kedas intervensaun husi Konseléiru Xanana Reading Room, Kay Rala Xanana Gusmão, atuál Priméiru Ministru hodi hatete ne’e “ajuda malu” nune’e ho espontáñia Samuel Marçal hatete “ajuda malu, prontu” atu ajuda no fó Konsellu ba Kay Olo, iha atividade karitativa sira.
Ministru MOP ne’e rekuñese Kay Olok nia influénsia ba povu Timor-Leste tanba dala-uluk hamutuk ho Kay Olok vizita área rurál hetan reasaun pozitivu tebes husi komunidade.
“Ha’u haree depois ami ba fatin barak-barak, kuaze ema hotu-hotu iha, hadomi boot tebes-tebes ba Kay Olok, ami kuandu la’o ne’e ema bolu maka Kay Olok, Kay Olok de’it, ami sa ema la liga liu. Maibé atu dehan onestu karik, ema 100 ne’ebé mai ne’e, lian ida bolu Kay Olok ne’e lian mane nian na’in rua ou tolu de’it, más 90% husi ema sira ne’e feto de’it maka hakilar barak liu Kay Olok, Kay Olok, hasai foto. Uluk ita rona Avo Nana foto lai, mas agora naran fali Kay Olok foto lai, ne’ebé kompetisaun uitoan”, Konseléiru Kai Olok ne’e konta.
Tanba ne’e, Konseléiru ba Fundasaun Kay Olok ne’e hatete presiza hanoin no deskuti saida mak bele halo, maibé ne’e nu’udar oportunidade di’ak ba Kay Olok, ba Fundasaun para bele halo buat ruma ba povu.
Antes ne’e, públiku konsege temi kona-ba prezensa Kay Olok nian nu’udar asesór juniór iha Gabinete MOP, maibé Ministru Obras Públikas, Samuel Marçal, defende Kay Olok nia prezensa atu ajuda de’it buat balun iha MOP.
Assesór mak pesoál ne’ebé iha méritu no esperiénsia iha área kompetente ne’ebé ema ne’e iha atu bele fó asesoria ba ema ruma iha instituisaun no organizasaun ruma.
Assesór ba ministru signifika ema ne’ebé bele fó asesoria ba ema ne’ebé lidera organizasaun ruma bainhira hala’o servisu no foti desizaun, tanba Governante presiza simu opiniaun husi assesór sira atu ezekuta programa servisu no mós foti desizaun. Iha konsultasaun ne’e ho esperansa katak realizasaun planu no programa bele tuir vizaun no misaun ministériu nian ne’ebé rezultadu ikus bele tuir espetativa ne’ebé iha.(*)
592 total views, 3 views today
Bele hare Video Seluk :
Subscribe to Timorpost
