Dili (Timorpost.com)—Arsebispu Metropolitano Dili, Dom Virgílio Kardeál do Carmo da Silva, SDB, Domingo (21/04/2024), inaugura Kapela Nossa Senhora do Rosario de Fatima Bairru-Pite, Dili.
Dom Virgilio Cardéal do Carmo da Silva, SDB, hatete ho haksolok ohin hamutuk iha ne’e hodi fó bensaun ba Kapela Nossa Senhora do Rosario de Fatima Bairro-Pite ne’e.
“Ohin ita halibur hamutuk iha ne’e, ho laran haksolok atu fó bensaun ba ita nia Kapela Nossa Senhora do Rosario de Fatima ida ne’e, maske kapela ne’e hari ho tempu ne’ebe naruk, maibe konsege finaliza no ohin ita hamutuk hodi inaugura kapela ne’e,” dehan Dom Virgilio Cardéal do Carmo da Silva, SDB, iha Omilia iha Selebrasaun Eukarista iha inagurasaun Kapela Nossa Senhora do Rosario de Fatima Bairro-Pite.
Iha oportunidade ida ne’e mos, Dom Virgilio Cardéal do Carmo da Silva, parabeniza Padre Paroco Santo Antonio Motael, Guilhermino da Silva no ba sarani tomak ne’ebe pertense ba iha sentru pastoral Bairu-Pite nian no kapela ida ne’e.
“La’os haksolok deit ba inagurasaun kapela ida ne’e, maibe ba imi nia servisu no sakrifisiu iha tempu naruk ida ne’e, too iha faze inagurasaun ida ne’e, maibe hakarak hatete katak rezultadu mak importante, maibe prosesu husi inisiu hau hanoin imporntante tebes, tanba kreda ne’e laos deit uma ka edifisiu, maibe ba ita ema sarani, sarani ne’ebe iha fiar, atu buka halibur hamutuk no aprende hamutuk iha tempu naruk hodi hari kapela ida ne’e,” nia afirma.
Arsebispu mós agradese ba Governu RDTL, doador privadu ne’ebe ho esforsu no kbiit apoiu ona konstrusaun Kapela Nossa Senhora do Rosario de Fatima Bairro-Pite ne’ebe kapaz ohin hetan ona bensaun.
Entretantu orsamentu ba konstrusaun kapela ne’e, faze dahuluk husi hahu konstrusaun husi 2008 to 2019: US$ 93,388.35, Faze segundu rehabilitasaun husi tinan 2020 to remata iha tinan 2023: US$ 130.000.00, Total kustu osan husi Konstrusaun Kapela Nossa Senhora do Rosario de Fatima Bairro-Pite hamutuk: US$ 223.388.35.
1,896 total views, 45 views today
Bele hare Video Seluk :