DILI (timorpost.com) – Konfruntu iha Surikmas, Aldeia Haburas, suku Bairru-Pité, Postu Administrativu Dom Aleixo, Munisípiu Dili, rezulta vítima Geovanio Pinto, hetan kanek iha parte ain no mós iha Ulun, tanba ne’e Polisia Nasionál Timor-Leste (PNTL) asegura ona suspeitu Na’in-rua.
Komandante PNTL, Munisípiu Dili, Superintendente Xefe Polisia Natércia Eufrásia Soares Martins, haktuir los duni konfruntu ida akontese horikalan Kinta (05/01), iha area surikmas, rezulta vítima Geovanio Pinto hetan kanek.
“Komandu PNTL Munisípiu Dili, simu informasaun katak konfruntu ida akontese iha area Surikmas Aldeia Haburas, tanba ne’e ami-nia ekipa eskuadra Dom Aleixo to’o iha fatin akontesimentu, konsege asegura suspeitu na’in-rua,” nia hateten hafoin partisipa avaliasaun servisu Ministériu Interior nian iha Sentru Formasaun Polisia Komoro, Sesta (06/01).
Nia dehan, suspeitu na’in-rua, ne’ebé sira asegura ne’e, prosesu investigasaun sei lao hela.
Nia hatutan, joven ne’ebé hetan kanek ne’e horikalan kedas nia família lori ba Hospital Nasionál Guido Valadares (HNGV) hodi halo tratamentu.
“Ha’u hakarak fó hatene katak, relatóriu ne’ebé ha’u simu, provokasaun mai husi tua, agora atu rezolve tua ne’e, polisia la bele rezolve, ida ne’e autoridade lokál sira-nia kompeténsia no instituisaun relevante nia kompeténsia, tanba ne’e ita presiza servisu hamutuk oinsá mak kontrola tua ne’e, la bele fan iha fatin arbiru, tanba lae joven sira hola, konsumu dez-entendimentu kiik ida, depois halai ba violénsia no mate,” nia hakotu.
Entretantu Geovania dos Santo, nu’udar sasin ba akontesimentu ne’e, konta los duni konfruntu ida horikalan akontese iha area Surikmas iha tuku 08:00 kalan, hodi resulta vítima Geovanio hetan kanek.
“Ha’u haree horikalan joven sira husi Gang 6 mak mai tuda vítima nia uma, hafoin sira buka vítima Geovanio Pinto, maibé vítima ne’e laiha, entaun sira ba buka iha gang 2 ho gang 3, iha ne’ebá sira hasoru vítima no sira ataka kedas, maibé vítima hatán ba sira, karik imi hakarak ita baku malu na’in ida-ida, maibé joven sira husi gang 6 lakohi no kontinua ataka nia, tanba ne’e vítima halai ba iha nia rezidénsia Gang 4, maibé sira kontinua ataka to’o rezulta kanek iha ain no mós parte uluk”, niae haktuir.
Nia hatutan, iha akontesimentu ne’ebé rezulta vítima kanek iha parte ain no ulun halo vítima muta la para, entaun família husi vítima lori kedas ba Hospital Nasionál Guido Valadares (HNGV), hodi halo tratamentu, iha momentu ne’ebá mós vítima baixa kalan ida.
2,919 total views, 6 views today
Bele hare Video Seluk :
Subscribe to Timorpost
