Dili, (timorpost.com)– Eleisaun Suku ne’ebé realiza ohin, loron 27, fulan-Abríl, tinan 2024, la realiza eleisaun ba xefe aldeia no delegadu no delegada ba aldeia Metin 1 nian, suku Bebonuk, postu administrativu Dom Aleixo, munusípiu Dili, tanba iha aldeia refere iha kandidatu úniku de’it.
“Ami la halo votasaun ba xefe aldeia Metin 1 tanba ami-nia kandidatu ida de’it”, António Marques, komunidade aldeia Metin 1 ba Timor Post, ohin iha sentru votasaun EBF Nú. 2 Bebonuk, Dili.
Nia hatutan, komunidade iha aldeira refere deside ho kandidatu úniku ka kandidatu ida de’it mak, xefe aldeia atuál, Martinho Francisco da Silva, no laiha kandidatu seluk mak bele kompete ho xefe aldeia refere.
“Ami laiha kandidatu seluk tanba ami komunidade deside hamutuk kandidatu ida de’it mak xefe aldeia atuál tanba durante ne’e xefe aldeia nia servisu di’ak loos”, nia hatete.
Iha fatin hanesan, xefe aldeia atuál, Martinho Francisco da Silva, hatete, nu’udar kandidatu ba xefe aldeia úniku inklui ho delegadu-delegada nian tanba durante ne’e, xefe aldeia ne’e serví komunidade ho di’ak, tanba ne’e, komunidade hili kandidatu úniku de’it.
“Iha aldeia ida-ne’e ha’u mós kandidata-an ba xefe aldeia ba aldeia Metin 1, suku Bebonuk. Tanba durante ne’e tuir komunidade nia haree ukun ne’ebé di’ak entaun iha tinan ida-ne’e kandidatu ba xefe aldeia Metin 1, kandidatu úniku, tanba ne’e mak iha Metin 1 vota mak ba xefe suku de’it mais xefe aldeia, delegadu no delegada mós úniku, tanba ne’e vota de’it mak ba xefe suku”, kandidatu úniku, xefe aldeia atuál, Martinho Francisco da Silva, informa.
Xefe aldeia ne’e hatete, núdar kandidatu úniku sei halo servisu di’ak liután hodi serví povu no apoiu dezenvolve aldeia no suku sai di’ak liután.*
1,632 total views, 48 views today
Bele hare Video Seluk :
Subscribe to Timorpost
