DILI (Timor Post.com)—Asosiasaun HAK husu ba Governu halo jestaun didi’ak atu fornese Bee ho dignu ba komunidade.
“Ita mai halo audiénsia ho komisaun E, atu konsidera Orsamentu Jerál Estadu (OJE), oinsá bele halo jestaun didi’ak, hodi integra ba fornesimentu Bee no saneamentu ba komunidade ho dignu.” Diretór Asosiasaun HAK, Feliciano da Costa Araújo, iha PN Kuarta-Feira (20/09/2023).
Tanba ita haree komunidade barak mak la utiliza Bee ka saneamentu ho sufisiente, nune’e ita mai atu husu ba komisaun relevante, hodi halo jestaun didi’ak ba fornesimentu Bee ba komunidade Timor Leste.
Sosiedade Sivíl la’ós mai halo monitoring ka Advokasia, ba polítika governu liuliu OJE de’it, maibé husu atu halo jestaun di’ak, interese komunidade liuliu fornesimentu bee ho dignu.
Governu tenke halo jestaun no atensaun ba atitude komunidade ninia, katak bo’or Bee no kanaliza Bee tenke tuir lei, entaun ne’e presiza fó atensaun, nune’e utiliza Bee ho iguál.” Diretór informa.
Nia dehan, komisaun E ne’ebé trata asuntu infraestrutura Bázika, tenke halo Fiskalizasaun didi’ak, ba orsamentu, no aloka orsamentu tenke tu’ir nia dalan, bainhira halo konstrusaun ba Bee ka saneamentu.
Iha fatin hanesan, Koordenadór Plataforma Bee no Saneamentu, Januário Amaral hatete, governu presiza halo jestaun ho didi’ak, atu bele fornese Bee ho adekuadu no sufisiente ba komunidade sira.
Tanba liuhusi Emprezáriu Bee Timor Leste Empreza Públiku (BTL, E.P) observa ba fornesimentu Bee ladauk sufisiente, tanba falla iha jestaun.
“Ita husu ba governu liuliu PM, liuhusi Komisaun E, atu halo Fiskalizasaun didi’ak, oinsá bele halo jestaun ho dignu, hodi fornese Bee ba komunidade iha territóriu tomak, liuliu iha munisípiu Dili ho sufisiente.” Nia rekomenda
798 total views, 12 views today
Bele hare Video Seluk :
Subscribe to Timorpost
