Dili (timorpost.com)—Asosiasaun Jornalista Timor Lorosa’e (AJTL) servisu hamutuk ho parseiru OXFAM Timor-Leste lori jornalista hosi média nasionál sira iha Timor halo vizita ba grupu joven feto no defisiénsia sira ne’ebé susesu iha area rural (AR).
Prezidente AJTL, Zevonia Vieira, hatete AJTL servisu hamutuk ho parseiru OXFAM tinan barak nia laran ona foka liu ba juventude sira, ema defisiénsia sira no grupu joven sira ne’ebé maka mai hosi munisípiu sira oinsá maka promove sira iha setór produtivu hodi kontribui diversifika ekonomia iha Timor.
“Entaun AJTL nia papél ida ne’e lori jornalista sira hodi ba vizita grupu feto sira ne’ebé maka moris iha area rural hodi foti sira nia istória, susesu ka obstakulu ne’ebé maka sira enfrenta iha sira nia moris, ne’e sai hanesan advokasia ida ba governu no parlamentu oinsá maka ukun na’in sira foti solusaun hodi haree problema ne’ebé maka sira hasoru ou oinsá maka governu apoiu joven sira ne’e hodi apoiu area produtivu sira hodi kria ekonomia iha rai laran”, Zevonia Vieira, nia diskursu iha Abertura Formasaun Media Tour, iha Salaun OXFAM Timor-Leste Hudi Laran, Tersa (15/04).
Nia hatete, AJTL fó servisu ba jornalista sira, tanba sira rasik maka komprende kona-ba asuntu sira ne’e no ida ne’e maka AJTL halo kolabora ho OXFAM hodi fó hanoin ba Governu atu tau importánsia ba setór produtivu sira ne’ebé kontribui ona sira nia-an no sira lahein saida maka governu tau importánsia ba sira.
“Iha programa ida ne’e AJTL sei ba Munisípiu Ermera hodi vizita joven produtivu sira iha setór Agrikultura, Turizmu no Seasonal Worker, ho nune’e maka ita konvida SEFOPE mai iha ne’e, tanba ita hakarak jornalista sira mós fó sai istória no benefísiu ne’ebé maka joven sira hetan bainhira sira servisu iha Australia fila mai muda sira nia ekonomia uma laran, sosiedade no mós ba nasaun”, Prezidente AJTL haktuir.
Aleinde ne’e iha fatin hanesan, Diretór Programa OXFAM Timor-Leste, Jude Perera, apresia tebes oportunidade ida ne’e, tanba kooperasaun di’ak entre Asosiasaun Jornalista Timor Lorosa’e (AJTL) ho OXFAM hodi halo kobertura ba joven sira nia kriatividade iha area rural.
“Ne’e hanesan oportunidade di’ak, tanba iha mós Governu liuhosi SEFOPE hola parte iha Workshop ida ne’e hodi partilla informasaun balu SEFOPE nian liga ba joven sira ne’ebé iha espasu síviku nakloke ba jornalista hodi halibur informasaun kona-ba kriatividade iha setór agrikultura no setór sira seluk no bele promove poténsia ne’ebé maka joven sira iha”, nia subliña.
Informasaun sira ne’e la’ós de’it iha baze, maibé lori ba hato’o ba iha ukun na’in sira kona-ba saida maka joven sira halo iha area rural, poténsia saida maka sira halo no saida maka presiza governu apoiu ba sira.
“Programa ida ne’e hetan apoiu hosi DFAT liuhosi projetu ida naran Hakfoun ne’ebé maka lidera hodi Ajénsia ida hosi Austrália maka apoiu programa ida ne’e, ne’ebé programa media tour ida ne’e hodi haforsa ita nia servisu hamutuk entre OXFAM ho AJTL ba projetu ne’ebé ho tinan naruk”, nia hakotu.
Nune’e mós iha fatin hanesan Diretór Nasionál Empregu Exterior SEFOPE, João Correia Pereira, hatete Diresaun Nasionál Empregu Esternu (DNEE), iha Sekretáriu Estadu Formasaun no Empregu Timor-Leste nia mahon, ne’ebé responsavel ba promosaun no jestaun programa sira atu rekruta no koloka traballadór Timor-oan sira iha merkadu traballu iha rai-li’ur.
Estabelese no mantein liña koordenasaun ho empregadór estranjeiru no parseiru sira seluk, nasionál ka internasionál, ho objetivu atu promove no kria oportunidade empregu ba Timor-oan sira iha rai-li’ur. Propoin no dezenvolve polítika ligadu ho Timor-oan sira hetan servisu iha rai-li’ur.
Koordena liuhosi Diresaun Jerál no Gabinete Sekretáriu Estadu nian ho Ministériu Negósiu Estranjeiru no Kooperasaun (MNEK) no ho Adidu traballu Timor-Leste nian iha rai-li’ur, kona-ba implementasaun kolokasaun no mobilizasaun traballadór Timor-oan sira iha rai-li’ur.
Dezenvolve no implementa polítika empregu iha rai-li’ur.Organiza no koordena prosesu selesaun no rekrutamentu traballadór sira hodi partisipa iha programa empregu iha rai-li’ur.
Ezerse podér sira seluk ne’ebé lei fó ka liuhosi desizaun, regulamentu ka determinasaun aas hosi Governu Timor-Leste.
1,809 total views, 42 views today
Bele hare Video Seluk :
Subscribe to Timorpost
