Ermera(timorpost.com)—Asosiasaun Jornalista Timor Lorosa’e (AJTL) liuhosi ninia membru jornalista sira ne’ebé maka hala’o media Tour iha Ermera halo asaun karidade ba Inan ferik, Filomena Soares, ne’ebé maka hetan Defisiénsia fíziku durante tinan rua nulu resin ona iha de’it nian toba fatin, iha Aldeia Palimanu, Suku Fatuquero, Postu Administrativu Railaku, Munisípiu Ermera.
Roberto de Deus, nu’udar la’en kaben hosi Inan Defisiénsia fíziku, Filomena Soares, agradese ba Maromak, tanba domin hosi jornalista sira ba to’o iha fatin hodi haree rasik kondisaun moris inan feton ne’e nian. Maski hala’o hela sira programa, maibé ho fuan ne’ebé boot hodi ba to’o iha fatin ida ne’e hodi haree rasik ho matan.
“Agradese ba Maromak tanba domin hosi Jornalista ne’ebé maka hamahon-an iha Asosiasaun Jornalista Timor-Leste (AJTL), ne’ebé maka hala’o sira nia programa Media Tour iha Munisípiu Ermera ne’e, ho fuan ne’ebé boot tebes hodi mai to’o iha ami nia fatin ida izoladu hanesan ne’e, hodi haree rasik ha’u nia kaben ne’ebé maka sofre defisiénsia fíziku ne’ebé maka hadeer ladi’ak, maibé ho nian esforsu-an rasik nia bele hadeer hodi tuur, maibé maun sira iha fuan boot duni, maski mai hosi fatin dodok, maibé mai to’o iha ne’e minutu ida ka rua hodi hamutuk ho ami iha fatin ne’e”, Roberto de Deus, ba Jornalista sira iha nia fatin, Aldeia Palimanu, Suku Fatuquero, Sesta (19/04).
Roberto mós hatete, sei reza nafatin “ba ita boot sira, halo nafatin ita boot sira nian servisu ho di’ak no susesu nafatin, atu lori nafatin Timor-Leste ba iha futuru ne’ebé di’ak.
Aleinde ne’e iha fatin hanesan Koordenadór Media Tour hosi Asosiasaun Jornalista Timor Lorosa’e (AJTL) ho Oxfam iha Timor-Leste, Constâncio Vieira, hatete Asosiasaun Jornalista Timor Lorosa’e (AJTL), hala’o asaun karitativa ba inan ferik ida ne’ebé maka defisiénsia hodi difkulta nia labele halo atividade loroloron nian. Tanba ne’e jornalista halo apoiu umanitária, jornalista la’ós halo advokasia de’it, pelemenus asaun ki’ik oan ne’ebé maka jornalista sira bele halo.
No apoiu hirak ne’e jornalista sira nian ideia rasik, bainhira sira ba vizita ema ho defisiénsia, sira iha hanoin katak, tenke halo buat ruma hodi bele apoiu ema ho defisiénsia, tanba jornalista sira hatene sira nian realidade ida ne’ebé maka iha.
“Buat ki’ik oan ne’ebé mak ami lori mai fó ba ita nia inan feton defisiénsia ne’e ami nia inisiativa rasik hodi hakarak lori mai, labele haree ba iha nia kuantidade barak ka uitoan, maibé haree ba ami nia domin, ami la’ós utiliza ami nia lapizeira tutun hodi hamamar ema nian fuan, maibé ami rasik uza saida maka ami bele iha, tanba buat ki’ik koan ne’ebé ami halo, la’ós haree hosi nian kuantidade, maibé ida ne’e ami haree hosi ami nia fuan ne’ebé maka ami bele fó”, Dehan Koordenadór Media Tour, Constâncio Vieira, ba Jornalista sira iha Inan Defisiénsia nian uma iha Palimanu, Suku Fatuquero.
Nune’e mós, nia enkoraja ba inan defisiénsia ho família sira, atu iha forsa nafatin hodi hasoru laloran ne’e, tanba moris ema ida rasik maka tenek esforsu hodi hasoru laloran ne’e, Jornalista sai hanesan sadere fatin ba ema lian laek sira de’it, maski mai ho lalais de’it.
“Ami sai ita boot nia sadere fatin maski lalais de’it. lalika hanoin barak, ita hakarak kontente, kontente de’it, ita hakarak tanis, tanis de’it. ita hakarak hirus, hirus de’it, so ida ne’e maka kompleta ita nia moris. Forsa nafatin hodi hasoru laloran ne’e, tanba bero moris ita maka hean rasik to’o Maromak fó kbiit nafatin ba ita. Ami La’ós moris iha Gleno, maibé ami iha ne’e, ami nian fuan iha Gleno”, nia esplika.
Enkuantu jornalista sira ne’ebé maka hamahan-an iha Asosiasaun Jornalista Timor Lorosa’e (AJTL) tenke iha fuan boot nafatin no mantein nafatin ho sira ne’ebé maka kbiit laek, sai lian ba sira lian laek jornalista tenke sai sira nian sadere fatin, iha ne’ebé de’it.
Nune’e mós Diretór Timor-Leste Organic Fertilser (TILOFE), Zaquiel Martins, hatete, sente kontente tebes servisu hamutuk ho AJTL no Oxfam iha Timor-Leste, Tanba AJTL hili ona TILOFE, EAMO, FJDE, ne’ebé maka durante ne’e servisu besik liu ba iha komunidade iha Ermera, no sai hanesan mata dalan ba jornalista sira oinsá maka lori sira atu bele deskobre problema sosiál sira ne’ebé maka akontese iha Munisípiu Ermera.
Problema sosiál ne’ebé maka jornalista sira atu foti maka liga ba iha agrikultura, Turizmu, Ekonomia no mós problema sosiál, Iha Suku Fatuquero ho prezensa jornalista konsege deskobre problema ema ho defisiénsia, sira balun apoiu hosi Governu, maibé ladún másimu no balun apoiu hosi Organizasaun, maibé seidauk másimu, entaun prezensa jornalista sira bele lori tan sira nian lian ba iha autoridade relevante sira.
“Atu ema ho defisiénsia labele sai de’it projetu iha momentu balun, polítiku sira labele halo sira hanesan temporariu de’it, maibé ema ho defisiénsia no LGBT sira, ema ne’e sai planu permanente ne’ebé maka governu iha devér atu tau atensaun ba iha ne’ebá”, nia dehan.
1,917 total views, 21 views today
Bele hare Video Seluk :