DILI, (timorpost.com)— Plataforma dijitál facebook nu’udar média sosiál ida ne’ebé bele forma liña amijade virtuál luan tebes laiha limasaun fatin no tempu. Facebook mós hanesan sítiu liña sosiál iha ne’ebé utilizadór bele inklina-an iha komunidade, iha servisu fatin, iha eskola, entre rejiaun no sidade atu hala’o koneksaun no halo interasaun ho ema seluk.
Aliende ne’e’e, facebook mós sai fatin ba utilizadór sira atu publika informasaun sira relevante atu ema seluk bele hatene no espera sentimentu pozitivu sira hodi enkoraja no motiva utilizadór seluk hodi infrenta moris loron-loron nian.
Anita de Jesus Brito, husi suku Talitú, postu administrativu Laulara, munisípiu Aileu, espresa nia sentimentu nu’udar ai-lebaoan liuhosi nia konta Facebook, Bii Soy (Tuhan Segalanya Bagiku), iha loron-Sesta (15/03) liubá hodi hatete todan tebes nu’udar ai-leba iha kapitál Dili, liu doben fó para, tanba hasoru defikuldade oioin, aliende hulan modo hale’u Dili hetan mós presaun husi saneamentu kapitál Dili ne’ebé dala-barak duni no harahun sasán ne’ebé sira hulan.
Bii Soy nu’udar ai-lebaoan sempre akompaiña nia pai, Armindo Brito de Fátima (63), leba mós modo husi foho laletek Talitú-Laulara nian tuun mai kapitál Dili fa’an hodi sustenta mós família uma-laran, liuliu ajunda nia pai ho mae, Francisc de Jesus (57), selu nia eskola rasik no alin sira-nian.
“O dehan doben fó para ne’e’e moras Sayang, O seidauk sente tuku 5 madrugada ho apa leba modo troka malu to’o estrada, rai-huun moos tiha pois to’o Dili. Ho apa fa’an modo la folin mak walikota (saneamentu-red) duni pois tebe-tan sasán sira ho apa fa’an ne’e’e, foti matan hateke foin ko’alia hasoru, walikota dehan hoee iha ne’e’e ami mak manda, haree nonook, hakarak o nia modo ami sama uut”, Anita de Jesus Brito, publika liuhosi nia konta facebook, Bii Soy, Sesta, (15/03) aneksu mós ho fotografia nia ho nia pai nian.
Nia hatutan, “Moras hateke apa nia oin, matan-been monu de’it. Love You Papa ho ha’u itrua luta ba futuru”.
Hafoin espresa nia sentimentu ninian ho nia pai liuhosi publikasaun badak ne’e’e, utilizadór facebook sira la fiar tanba publikasaun sira antes iha nia konta facebook mesak fotografia kontenti nian no laiha espresaun nune’e, no iha mós fotografia balun ne’ebé hatudu katak Bii Soy daudauk ne’e’e hala’o hela nia estudu iha Ensiñu Superiór balun iha kapitál Dili.
Ho nune’e, Bii Soy, publika hikas publikasaun ho paragrafu naruk oituan liuhosi nia konta facebook iha loron-Tersa, (19/03) horseik, hatán katak, liuhosi publikasaun antes ne’e’e nia hetan motivasaun furak no hakarak dada lia direita maibé iha ema lubuk ida mak hato’o mensajen direita hodi dezafia nia katak leba duni modo ka lae, keta halo promosaun de’it.
Nune’e, Bii Soy ne’ebé daudauk ne’ebé hala’o hela estudu iha Universidade balun iha kapitál Dili ne’e’e hatan katak, nia la’os iha ona universidade maka leba no fa’an modo maibé husi kedas Ensiñu Primária to’o ohin loron.
“Ha’u ne’e la’os universidade ona mk foin fa’an modo, hahú SD klas 5, ain-tanan, hatais sinelus la hatene, ha’u hahú luta ona ho apa moris ai-leba. O seidauk sente bainhira o leba modo to’o iha Dili, o fa’an di’ak ida folin, di’ak ida lae, so hatene julga de’it ha’u maibé o lahatene ha’u ho apa-nia sofrimentu moris ai-leba. O mak iha ha’u-nia pozisaun ha’u sente o rende de’it tanba folin hanehan kaba’as to’o bubu mak foin hetan osan, di’ak ida la folin tan walikota mai duni o tuun sa’e, halai ba mai”, Bii Soy, hatán.
Tuir Bii Soy, moris ne’e la fásil hanesan ema seluk imajina ba família ne’ebé kbi’it laek ka laiha buat hotu, tenke hulan, leba sasán todan husi foho baku-ain husi Talitú liuhosi laletek Malikeo depois kontinua mai Aituri-Laran no hale’u kapitál Dili fa’an. Iha sorti di’ak fila ho kontenti tanba rezidente iha kapitál Dili bele hola hotu mais dala-barak mós laran susar no triste bainhira la hola ka hola la hotu, sa-tán iha momentu ida tenke estraga modo ne’ebé ita leba iha dalan-kalan, sente todan tebes, Laran Susar ho Matan-Been maibé korajen nafatin.
“Moris nu’udar ai-leba ne’e la fásil no luta iha tinan naruk nia laran mós la fásil, o seidauk sente o haree o nia belun ki’ik ne’ebé iha tempu hodi halimar maibé iha idade ne’ebé ki’ik o oferese o nia-an hodi luta ho o nia apa. Ha’u agradese no kontenti ho ha’u-nia moris ida-ne’e, no o mós seidauk sente bainhira uma laran foos laiha, ama ho apa ko’a modo, ha’u ho alin lae maun leba ba fa’an iha ema seluk nia bairru, di’ak ida la folin tan moris ne’e la fásil”, nia espresa.
Bii Soy enkoraja mós ema sira ne’ebé la fiar atu bele buka took informasaun kona-ba nia iha fatin ne’ebé nia hela ba, “Ha’u leba modo hatene ka lae? Ha’u hahú luta ho apa leba tinan 14 ona agra ha’u eskola ona universidade. Hakarak hatete obrigada barak ba o ne’ebé julga ema la haree ba ema-nia realidade moris”.
Nia la espera no hakfodak tanba fotografia ne’ebé nia tau ho nia pai bele virál tiha kuaze ema rihun mak fahe tutan, komentáriu.
“Ha’u sente ne’e la’os ha’u-nia hakarak maibé Maromak nia planu, tanba dala-barak ho apa fa’an modo sempre simu trata no tolok husi ema seluk maibé subar iha fuan de’it”.
Publikasaun dahuluk (15/03) virál tanba tanba to’o ohin (20/03) liu loron 5 de’it hetan reasaun maka’as husi utilizadór sira tanba bele fahe hamutuk rihun 3.7 resin, komentáriu 897, gosta publikasaun ne’e hamutuk rihun 4,5 resin.
Entretantu publikasaun daruak husi horseik (19/03) to’o ohin loron fahe ona husi utilizadór sira hamutuk 323, komentáriu hamutuk 266, gosta hamutuk 745.
Bii Soy ho naran loloos, Anita de Jesus Brito, oan husi pai, Armindo Brito de Fátima (57) no mae, Francisca de Jesus (63). Bii Soy nu’udar mós oan datoluk husi maun-alin na’in-7.(*)
5,610 total views, 3 views today
Bele hare Video Seluk :
Subscribe to Timorpost
