(Reportajen Estaziadu Mariano Abi/Editor Mateus da Cruz)
Dili (Timor Post) – Banku Mundial entrega relatóriu final kona-ba avaliasaun demanda turístika, husi analiza oferta no demanda tuir perspetiva turistika domestika no internasionál ba governu Timor Leste (TL) liu hosi Ministériu Koordenadór Asuntu Ekonómiku (MCAE-Sigla Portugés).
“Ministériu Koordenadór Asuntu Ekonómiku parseria ho Banku Mundial no USAID nia projetu Turizmu Ba Ema Hotu ofisialmente entrega relatóriu ne’e atu utiliza hanesan referénsia importante ba dezenvolvimentu setór turizmu iha Timor-Leste,” dehan Ministru, Koordenadór Asuntu Ekonómiku, Joaquim Amaral, iha Salaun Trade invest, Kolmera, Segunda (16/05).
Nia hatete, Turizmu sai hanesan setór estratéjiku ida ba ekonomia Timor-Leste, tanbá ne’e MCAE nu’udar responsavel ba asuntu ekonómiku observa katak demanda turístika sai hanesan baze importante ida ba setór turizmu atu ita bele hatene di’ak liután Timor-Leste nia merkadu doméstika no internasionál ligadu ho atrasaun produtu turístika ne’ebé Timor-Leste iha.
Tanba ne’e, MKAE, Joaquim Amaral lori Governu Timor-Leste nia naran, hato’o agradesementu wai’n bá Banku Mundial ne’ebé konklui ona relatóriu final ne’e iha fulan Agostu 2021, bazeia ba pedidu husi VIII governu Konstitusionál at raves MKAE iha tinan 2018.
“Hodi Governu Timor-Leste nia naran, ha’u hato’o agradese wa’in ba Grupu Banku Mundial no USAID ne’ebé apoia ona hodi prodúz dokumentu importante ne’e, atu sai hanesan referénsia ba Planeamentu Setór Turizmu,’’ nia hato’o.
Relatóriu final ne’e sei sai hanesan referénsia importante ba parte interesada sira liuliu governu no setór privadu sira ne’ebé involve direta ou indireta iha indústria turizmu atu utiliza ba dezenvolvimentu setór turizmu no mós util tebes ba akadémiku iha nivel universitáriu sira hodi hakerek sira-nia teze.
Relatóriu ne’e mós sai hanesan baze importante ida bá rekuperasaun ekonomia iha setór turizmu, tanbá ninia konteúdu rasik demonstra mós kona-bá impaktu pandemia COVID-19 bá setór turizmu iha kontestu Timor-Leste no globál.
Iha parte seluk, Ministru Turizmu Komérsiu no Indústria (MTCI), José Lucas do Carmo da Silva, hatete, nia apresia tebes inisiativa husi parseiru dezenvolvimentu Banku Mundial no USAID ne’ebé halo ona esforsu hodi prodús relatóriu ne’e hodi referénsia importante ba ministériu turizmu atu hala’o ninia servisu sai susesu liután.
“Ha’u hato’o ha’u nia apresiasaun boot tebes ba parseiru dezenvolvimentu Grupu Banku Mundial no USAID, ne’ebé halo ona kontribuisaun signifikante ba governu Timor-Leste, espera sei util ba iha planeamentu no dezenvolvimentu turizmu iha nasaun ida ne’e, atu bele susesu liután,” nia dehan.
Tuir nia, dezenvolvimentu setór turizmu atu la’o ho susesu presiza iha apoiu husi ministériu relevante sira, tanba indústria turizmu ne’e, hanesan setór ida ne’ebé transversal signifika interligadu ho setór sira seluk hanesan, transportasaun, imigrasaun, seguransa rai-laran, infra-estrutura, saúde, servisus hospitalidade no seluktan.
Xefe Misaun USAID Timor-Leste, Zema Semunegus, dehan, USAID nia projetu Turizmu Ba Ema Hotu durante ne’e parseria ho Banku Mundial no MCAE atu asegura Timor-Leste bele hetan dokumentu demanda turístika ida ne’ebé disponivel ba parte interesada turizmu nian, hodi uza ba dezenvolvimentu indústria turizmu iha rai laran.
“Nasaun ida nia setór turizmu atu la’o di’ak liután, presiza iha avaliasaun demanda turístika atu ita bele hatene saida loss mak turista sira hakarak bainhira atu ba vizita rai ida, atu nune’e ita mós bele halo preparasaun ida ne’ebé di’ak liu hodi simu sira tuir sira-nia demanda,” nia relata.
Nia esplika, maski Timor-Leste iha potensiálidade produtu turístiku ne’ebé boot, maibé presiza halo promosaun iha nivel hotu-hotu, inklui iha rejiaun ASEAN no global hodi nune’e, bele atrai ema barak mai vizita.(Lee Notisia Seluk Iha Jornal Timor Post/ Asesu You Tube Timor Post)
653 total views, 3 views today
Bele hare Video Seluk :
Subscribe to Timorpost
