DILI— Ekipa husi Autoridade Nasionál Petróleum no Minériu (ANPM) loke ona investigasaun ba kompañia Risa Fuel ne’ebé kazu deskonfia faan mina kahur ho bee.
Tuir observasaun Jornalista Timor Post iha loron Kinta (30/01/2020), iha estasaun Risa Fuel ne’ebé lokaliza iha Taibessi-Halilaran, Dili, haktuir, ekipa ANPM ba ona iha estasaun ne’e hodi foti ona sampel mina no lori ba halo teste iha laboratórium.
Entretantu Autoridade Kompañia Risa Fuel lakohi fó komentáriu ba Timor Post. Parte ne’e loke odamatan ba ANPM halo investigasaun hotu maka bele fó sai lia loos ba públiku.
Tuir observasaun Jornalista Timor Post haktuir, maske ekipa husi ANPM ba foti ona sampel mina ne’ebé kliente sira lori fila iha masa, maibé ANPM la segel no atividade iha estasaun Risa Fuel kontinua la’o hanesan baibain.
Kliente sira halo protestu hasoru kompañia Risa Fuel iha loron Kuarta (29/01/2020) hafoin enxe mina iha estasaun ne’e, tanba bainhira estarta karreta la moris no ema balun lori fila mina iha masa tanba haree hetan mina kahur ho bee.
Iha loron ne’ebé kliente sira halo protestu hasoru kompañia, karreta Parlamentu Nasionál (PN) ne’ebé deputadu husi PD, Adriano do Nascimento uza mós ba enxe mina iha estasaun ne’e, no akontese mós karreta ne’e a’at no tenke lori ba hadi’a iha ofisina.
“Ha’u nia karreta a’at iha pertamina (estasaun) ho naran Risa Fuel iha Taibesi Halilaran, ne’ebé parlamentu nasional kontrata hodi fornese mina ba parlamentu nasional. Sira nia mina kahur ho bee ou líkidu seluk,” Deputadu Adriano hato’o lamentasaun ne’e ba Timor Post hafoin enxe mina iha Estasaun Risa Fiel.
Deputadu ne’e haktuir, nia ba enxe mina litru 107 tanba atu ba halo fiskalizasaun iha Munisípiu Lautem, maibé tanba hasoru fali problema ne’e nia labele hala’o viajen no tenke lori karreta ne’e ba offisina.
To’o iha offisina, nia haktuir, mekániku sira hasai duni bee kahur ho mina no deskobre karreta nia bomba, enjeksi no asesoris lubuk ida mak tenke troka no tenke hameno husi Austrália.
Deputadu Adriano mós haktuir ba Timor Post katak, bainhira nia kestiona iha estasaun Risa Fuel, iha momentu ne’eba mós komunidade lubun ida ba hato’o mós reklamasaun hanesan, hodi lori fila mina (bensin) ba estasaun ne’e tanba sira nia karreta no motosikleta mós a’at hotu.
Reprejentante povu ne’e hatete, nia foin ba enxe mina ba dahuluk iha estasaun ne’e no hatene katak kompañia ne’e mak manan tender fornese mina ba parlamentu nasionál.
“Kompania ne’e parese foin hetan tender iha AMP nia ukun ne’e tanba antes ne’e kompañia Eto, Aitula mak fornese mina ba parlamentu nasionál,”Adriano haktuir.
To’o notísia ne’e públika, Timor Post seidauk konsege hetan konfirmasaun ho kompañia na’in Risa Fuel, no halo konfirmasaun ho Sekretáriu JErál Parlamentu Nasionál kona-ba kompañia ne’e manan tender horbainhira no prienxe duni kritéria ka lae.
Tuir Deputadu Adriano, fízikamente haree kompañia Risa Fuel la prienxe kritéria hodi manan tender fornese mina ba parlamentu nasionál, tanba tuir nia hatene kompañia ne’e nia sub-estasaun iha munisípiu sira mós laiha. (ato/cao)
898 total views, 3 views today
Bele hare Video Seluk :
Subscribe to Timorpost
