DILI—Tuir dadus ne’ebe kobre hosi territóriu nasionál katak durante fulan Janeiru to’o Marsu tinan 2023, iha pasiente Tuberkuloze (TBC) na’in-55 mak mate.
“Durante fulan tolu pasiente ne’ebé lakon sira nia vida tanba moras tuberkuloze total hamutuk 55 iha territóriu nasionál”, dehan Xefe Programa Tuberkuloze Nasionál iha Ministériu Saúde, Constantino Lopes, ba Jornalista iha knaar fatin Lahane-Oriental, Tersa (09/5).
Nia hatete, durante ne’e atendementu ba pasiente sira tantu iha nivel munisipál no nasionál ho moras TBC la’o di’ak hela, realidade hatudu pasiente kuaze porsentu 91 susesu ba tratamentu, maibé iha munisípiu balun taxa mortalidade sei aas tanba pasiente moras todan ona maka foin lori mai halo tratamentu.
“Dala barak komunidade balun hetan ona moras tuberkuloze sira konsumu fali ai-moruk tradisionál, komunidade balun la preokupa entaun grave ona foin mai halo tratamentu ne’e halo diagnose tarde ona,” nia dehan.
Dadus durante fulan tolu nia laran, ministériu saúde konsege deteta kazu tuberkuloze hamutuk 1,393 Husi kazu hirak ne’e iha mós kazu pozitivu ne’ebé pertense atu hada’et iha komunidade nia leet kuaze 768 kazu ne’ebé deteta iha territóriu laran tomak.
Nia dehan, haree ba kazu ne’ebé ho númeru aas, ministériu saúde servisu hamutuk parseiru dezenvolvimentu sira kontinua halo screening ba kada munisípiu ida-idak.
Nia haktuir, esforsu ida ne’e governu halo atu nune’e bele deteta kazu tuberkuloze iha komunidade sira. Tanba deklarasaun husi Primeiru Ministru, Taur Matan Ruak, tinan 2025 Timor-Leste tenke livre husi moras tuberkuloze.
2,335 total views, 6 views today
Bele hare Video Seluk :
Subscribe to Timorpost
