(Reportajen Jaime Pires/Editor Mateus da Cruz)
DILI (Timor Post)- Atleta husi federasaun Atletizmu, oferese medalla osan mutin ida ba Timor-Leste iha kompetisaun Sea Games ne’ebé realiza iha Hanoi, Vietname, Medalla ida ne’e mós hanesan prezente furak ida ba komemorasaun restaurasaun independénsia Timor Leste nian ba dala 20.
“Horisehik ita nia Atleta Felisberto de Deus konsege sai segundu lugar hafoin ba kompete iha jogu Sea Games ne’ebé mak realiza iha Vietname, orgullu boot tanba halai 5 mill metru nia tama iha segundu klasifikasaun, dehan Prezidente Federasaun Atletizmu Timor-Leste, Afrânio Xavier do Amaral ba Timor Post, Via telefone, Segunda (16/05).
Nia hatete, “Rezultadu ida ne’e hanesan prezente ida ba ita nia nasaun Timor-Leste tanba agora ita tama ba komemorasaun Restaurasaun Independénsia 20 de Maiu,”.
Rezultadu ne’e hetan tanba esforsu husi parte hotu-hotu hanesan sekretáriu Estadu Juventude no Desportu (SEJD) inklui federasaun no Atleta rasik.
Atleta ho idade (23) ne’e partisipa jogu Sea Games dala rua ona, maibé agora Nia hatudu Rezultadu di’ak, tanba horisehik ne’e nia araska ona atu hetan monu demora iha kuartu lugar maibé ho grasa maromak Nia no ita hotu nia apoiu nia esforsu an to’o hetan segundu lugar.
Ho Rezultadu ida ne’e fanu atensaun husi Governu liu-liu Sekretáriu Estadu Juventude no Desportu hodi tau atensaun di’ak liután iha area desportu, hodi halo kondisaun ba federasaun hotu-hotu no mós Atleta sira ba futuru di’ak liután. (Lee notisia seluk iha Timor Post/Asesu You Tube Timor post)
731 total views, 3 views today
Bele hare Video Seluk :