Balibar (timorpost.com)—Prezidente Partidu Kongresu Nasionál Rekonstrusaun Timor (CNRT), Kay Rala Xanana Gusmão, husu ba joven sira tenke kria pás no estabilidade, labele provoka malu, tanba manan ka lakon iha eleisaun parlamentár (ElPar) tinan ne’e hanesan jogu ida.
“Ha’u husu ba povu tomak liuliu joven sira hosi partidu seluk gosta provoka favor ida ita respeitu malu, lae ita la-temi festa demokrasia, festa demokrasia ita hotu tenke kontente, ne’ebé iha jogu, iha buat hotu-hotu manan ka lakon ne’e jogu ida”, dehan Kay Rala Xanana Gusmão, ba Jornalista sira antes ba vota, iha Sentru Votasaun Sede Suku Balibar, Domingu (21/05/2023).
Nia hatete, CNRT lakon iha 2017 la provoka buat ida, sai hosi governu 2020 la provoka buat ida.
“Ho ida ne’e mak povu komesa haree, povu komesa estuda no ha’u kontente tebes ita bele garantia pás no estabilidade hahú hosi 2020 to’o agora”, Prezidente CNRT subliña.
Lider Karizmátiku ne’e dehan, ikus-ikus ne’e ba halo kampaña mak provoka malu no oho malu ida ne’e ladún di’ak, taba ne’e husu ba joven sira sai sidadaun ne’ebé di’ak.
“Tanba ha’u husu ba militante no simpatizante partidu CNRT nian, karik ita sei manan, tanba ha’u hatene ita manan, labele halo provokasaun oioin, labele sibuk provokasaun hanesan foin daudauk fila hosi Tasi-Tolu mai ne’e, ne’e hanesan ema buka estraga tiha ambiente”, nia hakotu.
3,306 total views, 3 views today
Bele hare Video Seluk :