DILI, (timor post.com)—Orientasaun Komandu Polísia Munisipiu Dili, atu koloka membru Polísia Nasionál Timor-Leste hodi asegura misa paskoa sabadu Aleluia, iha igreija sira iha sidade Dili.
Informasaun hirak ne’e Komandante Operasionál Komandu Polísia Munisipiu Dili, Inspetur Xefe Polísia, Jose Luis Amaral, hato’o ba Timor Post liuhusi telefone, sabadu, 08/04.
“Orientasaun husi Komandu Munisipiu Dili mai komandante seksaun operasaun atu prepara planu operasaun hodi koloka membru Polísia asegura misa paskoa iha igreija sira”,Komandante Seksaun Operasaun Komandu Polísia Munisipiu Dili, Inspetur Xefe Polisia Jose Luis informa.
Inspetur Xefe Polísia Jose Luis hatete, kolokasaun membru Polísia iha igreija no kapela iha Dili laran ne’e atu kontrola movimentu sarani sira nian hodi selebra misa paskoa ne’e ho di’ak no prosperu nia laran.
“Ami Koloka membru sira iha igreija, kapela, ne’e atu Sarani sira, ita nia populasaun bele selebra misa Páskoa, La’o ho di’ak, pás no dame nia laran”, Komandant Seksaun Operasional, Jose Luis hateten.
Nia afirma, maski númeru pesoal PNTL iha munisipiu Dili seidauk sufisienta para atu kobre hotu problema sira iha sidade laran, maibé komandante ne’e garantia seguransa ba povu sira tanba Unidade Polísia sira hanesan UEP, UPM, UPF, SIP mós fó apoiu ba komandu munisipiu Dili.
Aleinde ne’e unidade Polísia apoiu munisipiu Dili, komandu PNTL mós halo koordenasaun ho servisu sekreta F-FDTL no mós SNI para hodi kontrola fó informasaun ba malu atu populasaun sira iha sidade Dili moris iha estabilidade no pás nia laran. (f10)
1,332 total views, 6 views today
Bele hare Video Seluk :